कांग्रेस सल्यानको सभापतिमा देउवा समूहका विष्ट विजयी

सुर्खेत– नेपाली कांग्रेस सल्यानको सभापतिमा केशबहादुर विष्ट निर्वाचित भएका छन्। प्रतिद्वन्द्वी ध्रुवराज पुरीलाई ५ मतले पछि पार्दै विष्ट सभापतिमा निर्वाचित भएका हुन्। 

विष्ट ६१२ मत ल्याएर विजयी हुँदा पुरीले ६०७ मत ल्याए। नवनिर्वाचित सभापति विष्ट संस्थापन (शेरबहादुर देउवा) समूहबाट निर्वाचित भएका हुन्। उनी जिल्ला समन्वय समिति सल्यानका प्रमुख समेत हुन्।

त्यहाँ जिल्ला कार्यसमितिका लागि संस्थापन र संस्थापन इतर (रामचन्द्र पौडेल) समूहले प्यानल नै बनाएर निर्वाचन लडेका थिए। सभापतिसहित अन्य पदमा पनि निकै कडा प्रतिस्पर्धा भयो। 

त्यस्तै उपसभापतिमा सन्तोष केसी र चक्र देवकोटा निर्वाचित भएका छन्। केसी संस्थापन र देवकोटा संस्थापन इतर समूहबाट निर्वाचित भएका हुन्।

सचिवमा एकराज बुढाथोकी र प्रकाश भण्डारी निर्वाचित भएका छन्। भण्डारी संस्थापन र बुढाथोकी संस्थापन इतर समूहका हुन्। सह–सचिवमा संस्थापन इतर समूहका जनकराज गौतम र पदमबहादुर बुढाथोकी निर्वाचित भएका छन्। बाँकी सदस्यहरुको मतगणना चलिरहेको छ। सल्यानमा जिल्ला नेतृत्वका लागि सोमबार निर्वाचन भएको थियो।