कांग्रेस पालिका अधिवेशन : सुर्खेतमा संस्थापन समूह बलियो

सुर्खेत- नेपाली कांग्रेसले बुधबार सुर्खेतका स्थानीय तहको नेतृत्व चयन गरेको छ। निर्वाचनको मतपरिणाम आएका ६ स्थानीय तहमा संस्थापन (शेरबहादुर देउवा) समूहको दबदबा देखिएको छ।

जस अनुसार सिम्ता गाउँपालिकामा विरेन्द्र रावत, गुर्भाकोट नगरपालिकामा हस्तबहादुर पुन, भेरीगंगा नगरपालिकामा रामबहादुर सिंह, लेकबेशी नगरपालिकामा उमेश पौडेल, चिङ्गाड गाउँपालिकामा डोरप्रसाद शर्मा र बराहताल गाउँपालिकामा भीम भण्डारी सभापतिमा निर्वाचित भएको निर्वाचन अधिकृत मदन रेग्मीले जानकारी दिए।

पुन र पौडेल सर्वसम्मत निर्वाचित भएका हुन्। कांग्रेसले गुर्भाकोटका र लेकबेशी बाहेकका पालिकामा निर्वाचनमार्फत नेतृत्व चयन गरेको हो। निर्वाचनको पदपरिणाम आएका सबै पालिकामा सभापतिसहितका पदमा संस्थापन समूहकै वर्चस्व देखिएको छ।

पञ्चपुरी नगरपालिका र चौकुने गाउँपालिमा मतपरिणाम आइसकेको छैन। यता वीरेन्द्रनगर नगरपालिकामा भने बिहीबार निर्वाचन हुँदैछ। 

वीरेन्द्रनगरमा सभापतिको लागि नारायण कोइराला र उपेन्द्र खड्का भिड्दै छन्। कोइराला संस्थापनइतर र खड्का संस्थापन समूहबाट निर्वाचनमा भिड्दै छन्। वीरेन्द्रनगर विगतदेखि नै थानी समूहका गढका रूपमा चिनिन्छ।

उसो त यसअघिसम्म सुर्खेतमा संस्थापनइतर समूह बलियो थियो। यसपालि भने वडादेखि पालिकासम्म संस्थापन समूह हाबी भएको छ। सुर्खेतमा संस्थापन समूहको नेतृत्व पार्टी महामन्त्री पूर्णबहादुर खड्का र संस्थापनइतर समूहको नेतृत्व केन्द्रीय सदस्य हृदयराम थानीले गर्दै आएका छन्।