जोशीलाई दिइयो पहिलो ई-पासपोर्ट, यस्ता छन् विशेषता

काठमाडौं- राहदानी विभागले विद्युतीय पासपोर्ट वितरण गर्न सुरु गरेको छ। बुधबार विभागले शताब्दी पुरुष सत्यमोहन जोशीलाई पहिलो ई–पासपोर्ट प्रदान गरी यस्तो पासपोर्ट वितरण सुरु गरेको हो।

अंग्रेजी नयाँ वर्षबाट ई–पासपोर्ट प्रचलनमा ल्याइने तयारी छ। परराष्ट्रमन्त्री डा. नारायण खड्काले जोशीलाई ई–पासपोर्ट वितरण गरी औपचारिक सुरुवात गरेका हुन्। 

अहिले विभागले मेसिन रिडेबल पासपोर्ट जारी गरिरहेको छ। ई–पासपोर्ट जारी गर्न सुरु गरिएको भएपनि यसलाई अनिवार्य भने बनाइएको छैन। तत्कालका लागि एमआरपीबाट पनि कुनै काम अड्कने छैनन्। 

यस्ता छन् विशेषता

विद्युतीय पासपोर्ट ६४ पृष्ठको हुनेछ। पासपोर्टको पहिलो कभर पृष्ठको भित्री पृष्ठमा नेपालको झण्डा र डाँफे राखिन्छ। पहिलो पृष्ठमा सगरमाथा, दोसोमा पोलि कार्बोनेट डाटा, तेस्रोमा लुम्बिनी, चौथो र पाँचौंमा राष्ट्रपति भवन, छैठौं र सातौ पृष्ठमा एकसिंगे गैंडाको तस्बिर रहनेछ।

ई–पासपोर्टमा विद्युतीय चिपसमेत हुन्छ। यसमा स्टोर भएको डाटा कम्प्युटरले रिड गर्न सक्छ। 

अन्तर्राष्ट्रिय नागरिक उड्डयन प्राधिकरण (आइकाओ)ले ई–पासपोर्टलाई सुरक्षित भनेको छ।