मुख्यमन्त्री राईले आज विश्वासको मत लिने

विराटनगर– प्रदेश १ का मुख्यमन्त्री राजेन्द्र राईले आज (बुधबार) विश्वासको मत लिने कार्यक्रम रहेको छ। मंगलबारको प्रदेश सभा बैठक प्रमुख प्रतिपक्षी दल एमालेका कारण स्थगित भएको थियो। 

नेत्रविक्रम चन्द ‘विप्लव’ नेतृत्वको नेपाल कम्युनिस्ट पार्टीले आह्वान गरेको नेपाल बन्दको प्रभाव देखाउँदै सांसद आउन नसक्ने भनी नेकपा एमालेका सांसदले मंगलबारको बैठक रोक्न माग गर्दै निवेदन दिएका थिए।

सभामुख प्रदीपकुमार भण्डारीले एमालेले निवेदन दिएपछि कार्यब्यवस्था परामर्श समितिको बैठक राखेर रोक्नुपर्ने प्रस्ताव गरेका थिए। सत्ता साझेदारदहरूले बैठक रोक्नु नहुने अडान लिएपछि निर्धारित समय भन्दा झन्डै २ घण्टापछि संसद् बैठक बसेको थियो। प्रतिपक्षका सांसदहरूको अनुपस्थिति रहेपछि बैठक १ मिनेट मात्र बसेर बुधबार बिहान साढे ११ बजे बस्नेगरि सभामुखले स्थगित गरे। 

बुधबारको बैठकमा प्रमुख प्रतिपक्षी दल सहभागी हुने भएको छ। 'मंगलबार बन्दका कारण माननीय ज्युहरू आउन सक्नु भएन। बुधबार आउनु हुन्छ,’ एमालेका प्रमुख सचेतक बुद्धिकुमार राजभण्डारीले भने।