रुकुम र सुर्खेतमा बन्द गराउँदै हिँडेका विप्लवका २० कार्यकर्ता पक्राउ

सुर्खेत- रुकुमपश्चिम र सुर्खेतबाट विप्लव नेतृत्वको नेपाल कम्युनिस्ट पार्टीका २० जना कार्यकर्ताहरु पक्राउ परेका छन्। नेपाल बन्द गराउँदै हिडिरहेको अवस्थामा रुकुमपश्चिमबाट १३ जना र सुर्खेतमा ७ जना पक्राउ परेको प्रदेश प्रहरी कार्यालय सुर्खेतले जनाएको छ।

विप्लव नेतृत्वको नेकपा रूकुमपश्चिमका जिल्ला सचिवालय सदस्य मोतिराम खड्का, पार्टी निकट अखिल क्रान्तिकारी रुकुम पश्चिमका अध्यक्ष सोमपाल कामीसहित १३ जना पक्राउ परेको प्रदेश प्रहरी कार्यालय सुर्खेतका प्रवत्ता माधवप्रसाद श्रेष्ठले जानकारी दिए। मुसिकोट नगरपालिका–१ खलंगाबजारमा गुडीरहेका दुई वटा जिप र दुई वटा मोटरसाइकलको चाबी थुतिरहेको अवस्थामा उनीहरूलाई पक्राउ गरिएको हो।

त्यस्तै सुर्खेतमा पनि दिनेश बोगटी र तुलाराज तिरुवासहित ७ जना विप्लवका कार्यकर्ताहरु पक्राउ परेका छन्। उनीहरुलाई सुर्खेतका विभिन्न स्थानबाट प्रक्राउ गरिएको प्रहरीले जनाएको छ। 

पेट्रोलियम पदार्थको मूल्यवृद्धि विरोधमा विप्लव नेकपाले नेपाल बन्द आह्वान गरेको थियो। उक्त पार्टीको प्रभाव कर्णालीका जिल्लाहरुमा पनि परेको छ। बन्दका कारण बजार तथा सार्वजनिक यातायातहरु ठप्प छन्। केही सरकारी कार्यालयहरु भने खुल्ला रहेको प्रहरीले जनाएको छ।