नेपाली महिला टिमले आज कतारसँग पहिलो टी-२० आई खेल्दै

काठमाडौं- सन् २०१९ को महिला टिमले पनि अन्तर्राष्ट्रिय टि-२० खेल्ने मान्यता पाएपछि नेपाली टिमले मंगबार पहिलो पटक टी-२० आई प्रतियोगिता खेल्दैछ। कतार भ्रमणमा रहेको नेपाली टिमले सिरिज आयोजक राष्ट्र कतारसँग टी-२० आई खेल्न लागेको हो।

२०२३ मा दक्षिण अफ्रिकामा हुने आईसीसी महिला टी-२० विश्वकपको एसियाली छनोटको तयारीमा रहेको नेपाली टिमले अभ्यास खेलका लागि कतारी राष्ट्रिय महिला टिमसँग तीन खेलको सिरिज खेल्ने लागेको हो।

त्यसमध्येको पहिलो खेल नेपालले मंगलबार खेल्दैछ। नेपाली महिला टिम र कतारी महिला टिमको खेल मंगलबार दिउँसो पौने ४ बजे दोहामा हुनेछ। कोभिड १९ को महामारीका कारण नेपाली टिमले २३ महिनादेखि अन्तर्राष्ट्रिय खेल खेल्न पाएको छैन।

नेपालले कतारसँगको सिरिजपछि यूएईमा एसियाली छनोट खेल्नेछ। सो छनोट नेपालसँगै यूएई, मलेसिया, हङकङ, भुटान र कुवेतले पनि प्रतिस्पर्धा गर्नेछन्। छनोटका खेल नोभेम्बर २२ देखि २८ तारिखसम्म हुनेछ।