बन्दबाट जनजीवनमा सामान्य प्रभाव

काठमाडौं- नेत्र विक्रम चन्दको नेतृत्वमा रहेको नेपाल कम्युनिस्ट पार्टीले मंगलबार आह्वान गरेको नेपाल बन्दको सामान्य प्रभाव परेको छ।  अघिल्ला दिनका तुलनामा सार्वजनिक सवारीसाधन कम सञ्चालन भएका कारण सर्वसाधारणमा कठिनाइ भएको देखिएको छ। औद्योगिक क्षेत्र र व्यापार व्यावसायमा पनि बन्दको सामान्य प्रभाव परेको छ।

यसैबीच सवारीसाधन जबरजस्ती बन्द गराउन खोज्ने ८६ जना बन्द कर्तालाई मुलुकका विभिन्न स्थानबाट नियन्त्रणमा लिएको गृह मन्त्रालयका प्रवक्ता फणिन्द्रमणि पोखरेलले जानकारी दिएका छन्। भाडाका ठुला सवारी साधन कम संख्यामा चले पनि निजी र सरकारी सवारीसाधन संचालनमा कुनै प्रभाव देखिएन। 

उक्त समूहले पेट्रोलियम पदार्थलगायत मूल्य वृद्धि फिर्ताको दबाब दिन बन्द आह्वान गरेको बताएको छ। यसैबीच महानगरीय प्रहरी परिसर काठमाडौंले नेपाल बन्द कार्यमा संलग्न काठमाडौंमा ६ जनालाई नियन्त्रणमा लिएको जानकारी दिएको छ। अहिले यातायातका सवारी साधन सामान्य रूपमा सुचारु भइरहेको र जनजीवन सामान्य रहेको प्रवक्ता रमेशकुमार बस्नेतले जानकारी दिए।