मलालाको बायोपिक 'गुल मकई'को पोस्टर सार्वजनिक

काठमाडौं- नोबेल शान्ति पुरस्कार विजेता 'मलाला युसुफजाई'को जीवनमा आधारित फिल्म 'गुल मकई'को पोस्टर सार्वजनिक भएको छ । आधिकारिक ट्वीटर हेन्डलबाट फिल्मको मोसन पोस्टर सार्वजनिक गरिएको हो । 

अमजद खानको निर्देशनमा बनेको फिल्ममा मलालाको भूमिकामा रिम शेख देखिँदैछिन् । स्वर्गीय ओम पुरी, अतुल कुलकर्णी, दिव्या दत्तजस्ता कलाकार फिल्ममा छन् । 'रिलिज डेट' भने टुंगो लागिसकेको छैन ।

मलाला पाकिस्तानको खैबर-पख्तुनख्वा प्रान्तको स्वात जिल्लास्थित मिंगोराकी स्थायी बासिन्दा हुन् । ११ वर्षदेखि 'गुल मकई' नामक आफ्नो डायरीमार्फत् तालिवानविरुद्ध अभियान थालेकी थिइन् । उनले स्थानीय किशोरीहरूलाई स्कुल जान रोक्ने तालिवानी निर्णयविरुद्ध शैक्षिक क्रान्ति नै गरिन् ।

९ अक्टोबर २०१२ मा स्कुलबाट फर्किंदै गरेकी उनलाई तालीवानी लडाकुले टाउकोमा गोली प्रहार गरेका थिए । तत्काल उनलाई उपचारका लागि बेलायतको राजधानी लन्डन लगिएको थियो । पूर्ण ठीक भएपछि उनले लन्डनमै शिक्षा लिइन् । 

उनको बहादुरीलाई संसारभर सम्मान गर्ने गरिन्छ । सन् २०१४ मा भारतका कैलाश सत्यार्थी र मलालालाई संयुक्त रूपमा नोबेल शान्ति पुरस्कार प्रदान गरिएको थियो ।