मुस्ताङको थासाङमा हिमपहिरो, स्थानीयको भागाभाग

काठमाडौं- मुस्ताङको थासाङ गाउँपालिका–२ नाउरीकोटमा हिमपहिरो गएको छ। मानापाथी हिमालको फेदीबाट आज बिहान १० बजेतिर हिमपहिरो झरेको हो।

पहिरो झरेपछि स्थानीयको भागदौड भएको छ। भागदौड गर्ने क्रममा एकजना शिक्षक र ६ जना विद्यार्थी घाइते भएको बताइएको छ। बस्तीमाथिको हिमालबाट हिमपहिरो झरेको ठूलो आवाज आएको थियो। 

भागदौडमा घाइते भएकाहरूको जोमसोम अस्पतालमा उपचार भइरहेको प्रहरीले जनाएको छ। पहिरोले बस्तीमा भने क्षति पुर्‍याएको छैन।

हिमपहिरोका कारण खोलामा पानीको बहाव बढेको बताइएको छ। हिमपहिरो गएको क्षेत्रमा स्थानीयका चौंरी थिए। चौंरीको अवस्थाबारे केही जानकारी आएको छैन।