मूल्यवृद्धिविरुद्ध अनेरास्ववियुको मसाल जुलुस [फोटो फिचर]

काठमाडौं- पेट्रोलियम पदार्थको मूल्यवृद्धिविरूद्ध प्रमुख प्रतिपक्षी दल नेकपा (एमाले) निकट अनेरास्ववियुको त्रिचन्द्र बहुमुखी क्याम्पसका विद्यार्थीले मसाल जुलुस प्रदर्शन गरेका छन्। मूल्यवृद्धि फिर्ता लिनुपर्ने माग गर्दै त्रिचन्द्र क्याम्पस परिसरमा शुक्रबार साँझ एमालेनिकटका विद्यार्थीले विरोध गरेका हुन्। 

अनेरास्ववियूले मूल्यवृद्धिको विरोधमा चरणबद्ध आन्दोलन गर्ने बताएको छ। उता सत्ताधारी नेपाली कांग्रेस निकटका विद्यार्थीले समेत मूल्यवृद्धि फिर्ता गर्न माग गरेका छन्। 

नेपाल आयल निगमले हालै मात्र डिजेल/मट्टीतेल र पेट्रोलमा ३-३ रुपैयाँका दरले मूल्यवृद्धि गरेको छ। अब डिजेल/मट्टीतेल र पेट्रोलको मूल्य क्रमश रु ११९, १३६ रुपैयाँ प्रतिलिटर पुगेको छ। खाना पकाउने ग्यासमा भने ७५ रुपैयाँ बढाएर १५७५ रुपैयाँ प्रतिसिलिन्डर कायम गरिएको छ।