काठमाडौं– न्यायपालिकामा उत्पन्न विवादका विषयमा प्रधानमन्त्री र कानुनमन्त्रीबीच छलफल भएको छ। प्रधानन्यायाधीश चोलेन्द्रशमशेर राणाको राजीनामाका विषयलाई लिएर झन्डै दुई सातादेखि सर्वोच्च अदालत लगायतमा न्याय सम्पादन प्रक्रिया ठप्प भएको विषयमा शुक्रबार प्रधानमन्त्री शेरबहादुर देउवा र कानुनमन्त्री दिलेन्द्रप्रसाद बडुबीच छलफल भएको हो।
राजनीतिक भागबन्डा खोज्ने प्रधानन्यायाधीश राणाले राजीनामा दिनुपर्ने मागसहित कानुन व्यवसायीहरू कात्तिक ८ गतेदेखि आन्दोलित छन्। यस्तै सर्वोच्चका न्यायाधीशहरुले पनि इजलास बहिष्कार गर्दै आएका छन्।
प्रधानमन्त्रीसँगको छलफलमा राष्ट्रियसभा सदस्य एवं वरिष्ठ अधिवक्ता राधेश्याम अधिकारी, महान्यायाधिवक्ता खम्बबहादुर खाती, नेपाल बारका पूर्वअध्यक्ष प्रेमबहादुर खड्का, वरिष्ठ अधिवक्ता हरिहर दाहाल र सर्वोच्च बारका अध्यक्ष पूर्णमान शाक्यसहित सर्वोच्च बारका पदाधिकारीसमेत सहभागी थिए।
‘न्यायालयमा देखिएको विवादका विषयमा प्रधानमन्त्रीज्यूलाई ध्यानाकर्षण गर्ने काम भएको छ। समस्या समाधानका विभिन्न विकल्पका बारेमा कुराकानी भयो’, छलफलमा सहभागी एक कानुन व्यवसायीले भने।