भीम रावलले गरे एमाले अध्यक्ष लड्ने संकेत

काठमाडौं- नेकपा एमालेका उपाध्यक्ष भीम रावलले एमालेको अध्यक्षमा उठ्ने संकेत गरेका छन्। अछाममा साँफैबगर नगर कमिटीले आयोजना गरेको कार्यक्रममा बोल्दै उनले यस्तो संकेत गरेका हुन्। 

'दसौँ राष्ट्रिय महाधिवेशनमा तपाईंहरूको स्वभिमान र भावनालाई झन्डाझैं बलियो गरी समात्छु। हार्ने जित्ने कुरा आफ्नो ठाउँमा छ,' उनले भने। यद्यपि उनले खुलस्त रूपमा 'अध्यक्षमा लड्ने' शब्द उच्चारण गरेनन्।  

अध्यक्ष केपी शर्मा ओलीले आफूहरूले उठाएको विषयलाई कार्यान्वयन नगरेको भन्दै उनले हालैमात्र १० बुँदे कार्यान्वयनका लागि गठन गरिएको कार्यदलको संयोजक र सदस्यबाट राजीनामा दिएका थिए। विगतदेखि नै अध्यक्ष ओलीको विरोधीका रूपमा चिनिएका रावलले माधवकुमार नेपालले नयाँ दल गठन गर्दा भने उनलाई साथ नदिएर एमालेमा नै रहेका थिए। 

एमाले एकताका लागि भन्दै गरिएको १० बुँदे सहमतिलाई आधार मान्दै उनीसहितका केही नेताले माधवको साथ छोडेका थिए।