बालुवाटारमा गठबन्धनको बैठक सुरु

काठमाडौं- सत्तारुढ गठबन्धनका नेताहरूको बैठक सुरु भएको छ। प्रधानमन्त्री निवास बालुवाटारमा साँझ ५ बजे सत्तारुढ गठबन्धनका नेताहरूको बैठक सुरु भएको बालुवाटार स्रोतले जानकारी दिएको छ। 

मन्त्रिपरिषद् बैठकपछि सत्ता गठबन्धनमा सहभागी नेताहरूको बैठक बसेको हो। साझेदार दलहरूबीच मन्त्रालय भागबन्डा अघि बसेको बैठक त्यसपछि भने बस्न सकेको छैन। बैठकमा समसामयिक राजनीतिक विषयमा छलफल हुने बताइएको छ। 

प्रधानमन्त्री शेरबहादुर देउवाले प्रधानन्यायाधीश चोलेन्द्र शमशेर राणाको कोटाबाट राणाका जेठान गजेन्द्रबहादुर हमाललाई मन्त्रीमा नियुक्त गरेपछि सिर्जना भएको न्यायालयको विवाद साम्य हुन सकेको छैन। राणाको राजीनामा माग गर्दै सर्वोच्चका न्यायाधीश र नेपाल बार एसोसिएसन आन्दोलनमा उत्रिएका छन्। 

न्यायालयको विवादका विषयमा सत्तारुढ घटक नेकपा (एकीकृत समाजवादी)का अध्यक्ष माधवकुमार नेपालले गठबन्धन बैठकमा छलफल गर्ने बताएका थिए। यद्यपि नेपाली कांग्रेसले भने प्रधानन्यायाधीशका विषयमा कांग्रेसले आधिकारिक रूपमा धारणा सार्वजनिक गरेको छैन। उता प्रमुख प्रतिपक्षी दल नेकपा (एमाले) पनि प्रधानन्यायाधीशको पक्षमै रहेको छ।