सल्यान बस दुर्घटना अपडेट : १२ जनाको मृत्यु, तीनको सनाखत

सुर्खेत- सल्यानको खलंगाबाट दाङको तुलसीपुरतर्फ गइरहेको रा १ ख २५५२ नम्बरको बस दुर्घटनामा मृत्यु हुनेको संख्या १२ पुगेको छ। आइतबार बिहान कपुरकोट गाउँपालिकामा भएको दुर्घटनामा १० महिला र २ पुरुषको मृत्यु भएको सल्यान प्रहरीका डीएसपी गोविन्दकुमार थापाले जानकारी दिएका छन्।

दुर्घटनामा परी मृत्यु भएका मध्ये तीन जनाको सनाखत समेत भइरहेको र बाँकी मृतकको भने परिचय खुल्न बाँकी रहेको उनले बताए। उनका अनुसार मृतकमध्ये सल्यानको छत्रेश्वरी गाउँपालिका-२ का २९ वर्षीय तिलक ओली, दाङकाे घोराही उपमहानगर नारायणपुरका ६५ वर्षीया इन्द्रा अधिकारी र दाङकै बबई गाउँपालिका-६ पञ्चकुलेकी ७० वर्षीया कलावती बुढाथोकीको सनाखत भएको छ।

‘मृत्यु हुनेमा एकएक जना बालक र बालिका छन्', डीएसपी थापाले भने, ‘केहीको घटनास्थल र केही उपचारका लागि स्वास्थ्य संस्थातर्फ लैजाने क्रममा बाटोमै मृत्यु भएको हो।’ उनका अनुसार मृतकमध्ये अधिकांश तिहार मनाएर फर्किएकाहरु छन्। घाइतेमध्ये १७ जनाको अवस्था गम्भीर छ। यस्तै १० जना सामान्य घाइतेको जिल्ला अस्पतालसहित सदरमुकाम खलंगाको स्वास्थ्य केन्द्रहरुमा उपचार भइरहेको छ। गम्भीर घाइतेहरुलाई थप उपचारका लागि हेलिकोप्टरमा नेपालगन्ज लैजाने तयारी भइरहेको थापाले बताए। 

दुर्घटनामा २६ जना घाइते भएका छन्। घाइतेका अनुसार बस तीव्र गतिमा थियो। बस सडकबाट करिब दुई सय मिटर तल खोलामा खसेको थियो। घटनास्थल सदरमुकाम खलंगाबाट १ घण्टाको दुरीमा छ।