तीन स्थानमा भएका सवारी दुर्घटनामा ५ जनाको मृत्यु

काठमाडौं- देशका छुट्टाछुट्टै तीन स्थानमा भएका सवारी सवारी दुर्घटनामा परी ५ जनाको मृत्यु भएको छ। जाजरकोट, धनुषा र काभ्रेमा भएका दुर्घटनामा परी उनीहरूको मृत्यु भएको प्रहरीले जानकारी दिएको छ।   

जाजरकोट जिल्ला छेडागाड नगरपालिका-१ ध्याप टाकुरास्थित सडकमा बा.०५ ख २५०१ नम्बरको मिनी ट्रक सडकबाट करिब २ सय ५० मिटर तल खसेर बिहीबार राति दुर्घटना हुँदा ट्रकमा सवार ३ जनाको घटनास्थलमै मृत्यु भएको छ। साथै दुर्घटनामा घाइते भएका चालक समेत अन्य ७ जनालाई जिल्ला प्रहरी कार्यालय जाजरकोट, ईलाका प्रहरी कार्यालय बडावन, ईलाका प्रहरी कार्यालय दशेरा र प्रहरी चौकी छेडाबाट खटिएको संयुक्त प्रहरी टोलीले उद्धार गरी उपचारको लागि सुर्खेततर्फ पठाएको छ। 

उता धनुषा, क्षीरेश्वरनाथ नगरपालिका-४ हरैयास्थित सडकमा ज ८ प ७०७२ नम्बरको मोटरसाइकललाई प्रदेश २-०२-००४ प ९०२८ नम्बरको मोटरसाइकलले ओभरटेक गर्ने क्रममा शुक्रबार बिहान दुर्घटना हुँदा प्रदेश २-०२-००४ प ९०२८ नम्बरको मोटरसाइकल चालक महोत्तरी भमरपुरा नगरपालिका-९ बस्ने २४ वर्षीय जितेन्द्र कुमार राय यादवको मृत्यु भएको छ। दुर्घटनामा गम्भीर घाइते भएका उनको प्रादेशिक अस्पताल जनकपुरमा उपचारको क्रममा मृत्यु भएको हो। दुर्घटनामा घाइते भएका ज.८ प ७०७२ नम्बरको  मोटरसाइकल चालक धनुषा गणेशमान चारनाथ नगरपालिका-६ बस्ने ३१ वर्षीय कृष्ण कुमार साह, मोटरसाइकलमा सवार उनकै श्रीमती २३ वर्षीया कुसुम कुमारी साह र छोरा २ वर्षीय रिहान कुमार साहको सोही अस्पतालमा उपचार भइरहेको छ। 

काभ्रे जिल्ला पाँचखाल नगरपालिका-६ तीनपिप्लेस्थित सडकमा बा ३ ख ९६८१ नम्बरको बसले बागमती प्रदेश ०२-०२२ प ९८४५ नम्बरको मोटरसाइकललाई शुक्रबार बिहान ठक्कर दिँदा मोटरसाइकल चालक सोही नगरपालिका-८ बस्ने २२ वर्षीय राम थापाको मृत्यु भएको छ। दुर्घटनामा गम्भीर घाइते भएका उनको धुलिखेल अस्पतालमा उपचारको क्रममा मृत्यु भएको हो। बस चालकलाई प्रहरीले नियन्त्रणमा लिएको छ । 

तीनै दुर्घटनाका सम्बन्धमा प्रहरीले थप अनुसन्धान गरिरहेको छ।