टी–२० विश्वकपबाट बाहिरियो वेस्ट इन्डिज

काठमाडौं- ओमन र यूएईमा जारी टी–२० विश्वकप क्रिकेटबाट वेस्ट इन्डिज बाहिरिएको छ। बिहीबार राति भएको आफ्नो चौथो खेलमा श्रीलंकासँग २० रनको हार बेहोर्दै वेस्ट इन्डिज विश्वकपबाट बाहिरिएको हो।

टस हारेर ब्याटिङको निम्तो पाएको श्रीलंकाले पुरा ओभर खेल्दै तीन विकेटको क्षतिमा १८९ रन बनाएको थियो। जवाफमा वेस्ट इन्डिजले निर्धारित २० ओभरमा आठ विकेट गुमाएर १६९ रनमात्र बनाउन सक्यो।

श्रीलंकाको जितमा चरिथा असलंका नायक रहे। उनले ४१ ब्लमा ६८ रन बनाएका थिए। उनीबाहेक पथुम निस्सान्कले ५१ रन बनाए भनवे कुशल परेराले पनि २९ रनको योगदान दिए।

वेस्ट इन्डिजका आन्द्रे रसेलले दुई विकेट लिए भने ड्वेन ब्राभोले एक विकेट गिराए। जवाफी ब्याटिङमा वेस्ट इन्डिजका सिमरन हेत्मायरले ८१ रन बनाए पनि जितका लागि पर्याप्त भएन। हेत्मायरबाहेक निकोलस पुरनले ४६ रन जोडे। अन्य खेलाडीले भने सम्झनलायक प्रदर्शन गरेनन्।

श्रीलंकाका बिनुरा फर्नान्डो, चम्मिका करुणरत्ने र वानिन्दु हसरंगाले समान २–२ विकेट गिराए। वेस्ट इन्डिजले चार खेलमा २ अंक मात्र जोड्न सकेको छ। त्यसैले ऊ जारी विश्वकपको सुपर १२ बाटै बाहिरिएको छ।

यता पाँच खेलमा दोस्रो जित निकालेको श्रीलंका पनि विश्वकपबाट बाहिरिइसकेको छ। गएराति श्रीलंकाले आफ्नो अन्तिम खेल खेलेको हो भने वेस्ट इन्डिजको एक खेल बाँकी छ।

बिहीबार रातिको अर्को खेलमा अस्ट्रेलियाले बंगलादेशलाई ८ विकेटले हराएको थियो। समूह १ बाट इंग्ल्यान्ड सेमिफाइनलमा प्रवेश गरेको छ। अब अस्ट्रेलिया र दक्षिण अफ्रिकामा एउटा टिम अर्को चरणमा पुग्नेछ। अस्ट्रेलिया र दक्षिण अफ्रिकाको समान ६–६ अंक छ।