आहा रारा माघ गोल्डकप माघ ६ देखि सुरु गर्ने तयारी

काठमाडौं- पोखराको सहारा क्लबले आयोजना गर्दै आएको आहा रारा गोल्ड कप माघ ६ देखि सुरु गर्ने तयारी गरिएको बताएको छ। फुटबल प्रतियोगिताको मुख्य प्रयोजनसमेत सूर्यबहादुर केसी ग्रुपले आयोजना गरेको  कार्यक्रममा यस्तो जानकारी दिइएको हो। 

यस्तै सहारा एकेडेमीलाई पोखराको केसी परिवारले वार्षिक १५ लाखका दरले १० वर्ष सहयोग गर्ने भएको छ। पोखरामा बुधबार एक कार्यक्रमका बीच स्व. सूर्यबहादुर केसीकी धर्मपत्नी प्रेमकुमारी केसी र सहारा क्लवका अध्यक्ष हरि गुरुङबीच सम्झौतापत्रमा हस्ताक्षर भएको छ। 

एकेडेमीको जिम्मेवारी लिए सँगै सहारा क्लब एकेडेमीको नाम समेत परिवर्तन हुने भएको छ। क्लबसँग दशवर्षे सम्झौता गर्दै ‘सुर्यबहादुर केसी स्मृति सहारा फुटबल एकेडेमी’ नामाकरण गरिएको छ। सम्झौता अनुसार केसी परिवारले एकेडेमीलाई लागि वार्षिक १५ लाख रुपैयाँ उपलब्ध गराउने छ। सहयोग र दाताको भरमा सन्चालन हुँदै आएको एकेडेमीमा पहिलो पटक ठूलो राशीको सहयोग आएको हो। 

एकेडेमीमा १४ जिल्लाका २४ जना बालकहरु बसेर पढिरहेका छन्। उनीहरुको शिक्षा दीक्षा सहित फुटबल प्रशिक्षण एकेडेमीले दिने गरेको छ। हालसम्म सहारा युके, सहारा हङकङ र सहारा अष्ट्रेलियाबाट सहयोग आउने गरेको थियो।

एकेडेमी चलाउनकै लागि क्लबले आहा रारा गोल्डकप आयोजना गर्दै आएको छ। क्लबले आफैले जग्गा खरिद गरेर पोखराको दोविल्लामा एकेडेमी सञ्चालन गरिहेको छ।