जाडेन र आजमीलाई किड ट्राइथालन उपाधि

काठमाडौं- जाडेन श्रेष्ठ ब्वाईज् र आजमी शेरचन गर्ल्सतर्फ लिटल डल्फिन्स् प्रालि किड्स ट्राइथलनको उपाधि हात पार्न सफल भएका छन्।

स्कुलस्तरदेखि नै खेलाडी उत्पादन गर्दै नेपालमा ट्राइथलन खेलको विकास र विस्तार गर्ने उद्देश्यले नेपाल ट्राइथलन संघको प्राविधिक सहयोग र लिटल डल्फिन्स् स्विम स्कुल प्राइभेटको आयोजनामा भएको प्रतियोगितामा जाडेनले १०० मिटर पौडी पाँच किलोमिटर साइक्लिङ र डेढ किलोमिटर दौड २० मिनट ५१.६१ सेकेन्डमा पूरा गर्दै उपाधि उचालेका हुन्। यस्तै आजमीले उक्त दूरी २३ मिनट १८.१० सेकेन्डमा पूरा गर्दै उपाधि हात पारेकी हुन्। 

विजयी खेलाडीहरुले प्रमाणपत्र, मेडल र १० हजार बराबरको गिफ्ट भौचर प्राप्त गरे। कालोपुलस्थित वेष्ट भेन्युमा भएको प्रतियोगितामा ब्वाइज्‌तर्फ अथर्व सिंहले दोश्रो स्थान प्राप्त गर्दा युभन लाल श्रेष्ठले तेस्रो स्थान प्राप्त गरे। सिंहले उक्त दूरी २१ मिनेट, १२ दशमलव ७२ सेकेन्ड र श्रेष्ठले २२ मिनट, १७ सेकेण्ड २० सेकेन्डमा पूरा गरे। यस्तै गर्ल्सतर्फ परिधि भण्डारीले २५ मिनट १७ दशमलव १६ सेकेन्ड र आर्या महर्जनले २६ मिनट १२.५४ सेकेन्डमा दूरी पुरा गर्दै दोश्रो र तेस्रो स्थान हात पारे।

दोस्रो र तेस्रो स्थान हात पार्ने खेलाडीहरुले मेडल, प्रमाणपत्रका साथै पाँच हजार र तीन हजारको गिफ्ट भौचर प्राप्त गरे। प्रतियोगितामा ब्वाइज्‌तर्फ जाडेन श्रेष्ठ र गर्ल्सतर्फ ज्योत्सना भट्ट युवा खेलाडी घोषित भए। उनीहरुले तीन हजार बराबरको गिफ्ट भौचर प्राप्त गरे।

विजयी खेलाडीहरुलाई प्रमुख अतिथि काठमाडौं महानगरपालिका वडा नं- ५ का अध्यक्ष रमेश डंगोल, नेपाल ओलम्पिक कमिटिका महासचिव एवं नेपाल ट्राइथलन संघका अध्यक्ष निलेन्द्रराज श्रेष्ठलगायतले पुरस्कार वितरण गरेका थिए। प्रतियोगितामा २२ ब्वाइज् र सात गर्ल्सको सहभागिता रहेको थियो।