भिनिसियस चम्किएको खेलमा रियलको जित

काठमाडौं- स्पेनिस क्लब रियल मड्रिडले शीर्ष डिभिजनको फुटबल ला लिगामा शनिबा साँझ जित निकालेको छ। एल्चेको मैदानमा भर्खरै सम्पन्न खेलमा उसले घरेलु टिमलाई २–१ गोलले हराएको हो।

रियलका लागि दुवै गोल भिनिसियर जुनियरले गरे। उनले खेलको पहिलो हाफमा एक र दोस्रो हाफमा एक गोल गर्दै टिमलाई जित दिलाएका हुन्। खेलको २२औं मिनेटमा मारियानो डियाजले दिएको पासको सदुपयोग गर्दै भिनिसियले पहिलो गोल गरेका थिए।

यता दोस्रो हाफको ६२औं मिनेटमा घरेलु टिमका राउज गुटीले दोहोरो पहेँलो कार्ड व्यहोरेछि उनी मैदानबाट बाहिरिएका थिए। १० खेलाडीमा समेटिएको एल्चेविरुद्ध मिडफिल्डर लुका मोड्रिचले दिएको पास सदुपयोग गर्दै भिनिसियले दोस्रो गोल गरे।

उनले सो गोल ७२औं मिनेटमा गरेका थिए। यता, खेलको ८५औं मिनेटमा एल्चेका पेरे मिल्लाले एक गोल फर्काएका थिए। यो जितसँगै १० खेलबाट २१ अंक बनाएको रियल दोस्रो स्थानमा उक्लिएको छ।

शीर्षस्थानको रियल सोसिडाडको २४ अंक छ। यता पराजित एल्चे भने १० अंकका साग १४ औं स्थानमा छ।