एमाले पोखरा महानगर अध्यक्षका लागि ५ जना उम्मेदवार

पोखरा– अध्यक्ष केपी शर्मा ओलीले निर्वाचन नगरी सहमतिको आधारमा पालिका नेतृत्व चयन गर्न निर्देशन दिए पनि मुलुककै ठूलो पालिका पोखरा महानगरमा नेकपा एमाले नेतृत्वको लागि निर्वाचन हुने भएको छ। निर्वाचन समिति संयोजक टिकाराम पंगेनीले उम्मेदवारी दर्ता भए पनि सहमतिको प्रयास भने जारी राखिने बताएका छन्। 

बुधबार नेकपा एमालेको पोखरा महानगरपालिका कमिटीको अध्यक्षका लागि ५ जनाको उम्मेदवारी परेको छ। दिलीप न्यौपाने, तेजनारायण अधिकारी, दीपक पौडेल, धनबहादुर नेपाली र हरिप्रसाद त्रिपाठीले अध्यक्षमा उम्मेदवारी दर्ता गराएको पंगेनीले बताए। हिजो सुरु नगर अधिवेशनमा आज नेतृत्व चयनको कार्यतालिका छ। 

उपाध्यक्षमा बैनबहादुर गुरुङ, उमा परियार, मोहन गुरुङ, राजकुमारी भुजेल र सुस्मिता केसी भट्टराईले उम्मेदवारी दिएका छन्। सचिवमा जीवनप्रसाद आचार्य र गोकर्ण अधिकारीको उम्मेदवारी परेको छ। नगर कमिटीमा १ जना अध्यक्ष, १ जना उपाध्यक्ष र १ जना सचिव हुने वैधानिक व्यवस्था छ। २ जना उपसचिव निर्वाचित हुने पार्टी विधान छ। उक्त पदका लागि भने १७ जनाको उम्मेदवारी परेको छ। सकेसम्म सबै उम्मेदवार मध्येबाट सर्वसम्मत नै नयाँ नेतृत्व चयन गरिने एमाले कास्कीका अध्यक्ष कृष्ण थापाले बताए।