मलेसियामा विदेशी श्रमिकमाथिको प्रतिबन्ध हट्यो

काठमाडौं- मलेसियाले झण्डै १६ महिनापछि कोरोना महामारीका कारण विदेशी श्रमिकको आवागमनमा लगाएको प्रतिबन्ध हटाउने भएको छ।

मलेसियाका प्रधानमन्त्रीले स्माइल साबरी याकोबले विदेशी श्रमिक र मलेसियाका केही स्थान विदेशी पर्यटकका लागि खुला गर्ने बताएको खबर रोयर्टस्ले लेखेको छ।

विशेष सावधानी अपनाएर विदेशी श्रमिक मलेसिया ल्याउन महामारी व्यवस्थापन विशेष कमिटी सहमत भएको छ। अहिले विशेष गरी प्लान्टेशन क्षेत्रको आवश्यकता पूरा गर्नको लागि विदेशी श्रमिकको आवागमन खुला गरिने भएको छ। 

मलेसियाले २०७६ चैत पहिलो साताबाट नेपाली श्रमिक लैजान रोकेको थियो। केही समययता श्रमिक अभाव भएपछि मलेसियाका सबै क्षेत्रका रोजगारदाताहरूले नयाँ श्रमिक भर्नाको अनुमति दिन त्यहाँको सरकारलाई दबाब दिइरहेका थिए। जसअनुसार प्लान्टेसन (रबर र पाम आयल उद्योग) क्षेत्रलाई पहिलो प्राथमिकता दिइएको छ। 

मलेसियाले नोभेम्बरको मध्यबाट केही क्षेत्र विदेशी पर्यटकका लागि खुला गर्ने भएको छ। मलेसियाले कोरोना विरुद्धको खोप लगाएका  र उच्च स्तरका पर्यटकको आवागमनलाई प्राथमिकता दिने छ। जसबाट कोरोना महामारीबाट खस्किएको अर्थव्यवस्थामा सहयोग पुग्ने मलेसियाको अपेक्षा छ।

रबर ग्लोभ्स उद्योगहरूले पनि मलेसिया सरकारसँग विदेश श्रमिकलाई ल्याउने अनुमति मागिरहेका छन्। थप श्रमिक नल्याएमा यस वर्ष र आउँदो वर्षको माग अनुसार उत्पादनमा समस्या हुने उद्योगले बताइरहेका छन्।