भरतमणिलाई भेटेपछि पूर्वयुवराज पारसले भने– हामी सम्पर्कमा रहनुपर्छ

काठमाडौं– कमेडी च्याम्पियन–२ का विजेता भरतमणि पौडेलले पूर्वयुवराज पारस शाहसँग भेट गरेका छन्। दुवैबीच करिब एक घन्टा कुराकानी भएको थियो।

पौडेलले केही दिनअघि भेटघाट भए पनि मंगलबार बिहानमात्र भेटको तस्बिर सामाजिक सञ्जालमा पोस्ट गरेका छन्। उनले पूर्वयुवराज शाह निकै रमाइलो भएको बताएका छन्।

पौडेलले पारससँग शुक्रबार अपराह्न ५ बजेतिर शेर्पा मलस्थित ओपनियन रेस्टुरेन्टमा भेट गरेका थिए। उनी पूर्वयुवराज पारस शाहकै क्यारिकेचर गरेर कमेडी च्याम्पियनमा चर्चित बनेका थिए।

भेट्नेबित्तिकै पूर्वयुवराज पारसले आफूलाई ‘फन्नी फन्नी’ भनेको भरतले सुनाए। ‘साँझ ५ बजेदेखि एक घन्टा बस्यौं, उहाँले मेरो भिडियो हेर्नुभएको रहेछ, एकदम रमाइलो लाग्यो भन्नुभयो। अनि आफ्नै स्टाइलमा उत्साह दिँदै भन्नुभयो– फन्नी फन्नी, किप इन टच। मलाई त एकदम मन पर्यो उहाँको सादगी जीवन देखेर। वर्षौदेखि उहाँको र मेरो चिनजान छ झैं लाग्यो। खाजा सँगै खाइयो। जे होस् त्यो भेट मेरा लागि ऐतिहासिक र रमाइलो थियो,’ भरतमणिले भने।