शिखर वार बुदोकैदो प्रतियोगिता यसै साता हुने

काठमाडौं- नेपाल बुदोकैदो फुलकन्ट्याक्ट संघको आयोजनामा प्रथम शिखर वार बुदोकैदो प्रतियोगिता कात्तिक ११ गतेदेखि सञ्‍चालन हुने भएको छ।

सातै प्रदेशबाट करिब २ सय ५० खेलाडीको सहभागिता रहेको प्रतियोगिता कात्तिक ११ बाट संचालन हुन लागेको हो। प्रतियोगिताबारे संघका उपाध्यक्ष वीरकृष्ण महर्जनले सोमबार आयोजित पत्रकार सम्मेलनमा जानकारी गराएका हुन्।

पुरुषमा ९ र महिलामा २ गरी जम्मा ११ विधामा प्रतिस्पर्धा हुनेछ। पुरुषमा ३० केजीमुनि, ३५ केजीमुनि, ४० केजीमुनि, ४५ केजीमुनि, ५० केजीमुनि, ५५ केजीमुनि, ६० केजीमुनि, ६५ केजीमुनि र खुला तौलसमूह स्पर्धा समावेश छन्।

महिलामा ४५ केजीमुनि र खुला तौलसमूहमा भिडन्त हुने छ। पुरुष÷महिला खुलामा पहिलो हुनेले १ तोला सुनको पदक तथा दोश्रोले ५ तोलाको चाँदीको पदक प्राप्त गर्ने छन्।

बाँकी हरेक स्पर्धाको विजेताले ५ हजार, उपविजेताले ३ हजार तथा तेश्रोले १ हजार ५ सय नगद पुरस्कार प्राप्त गर्ने छन्। तीनदिने प्रतियोगिताका खेलहरु काठमाडौंको बसन्तपुर डबलीमा हुनेछ।