सुडानमा कू, प्रधानमन्त्रीलगायत मन्त्रीहरू नजरबन्दमा

काठमाडौं– सुडानमा सत्तापलट भएको छ। त्यहाँका प्रधानमन्त्री तथा मन्त्रीहरु गिरफ्तारीमा परेका छन् भने सडकमा सैनिक तैनाथ छन्। 

बीबीसीका अनुसार सैनिक कू पछि अन्तरिम सरकारका मन्त्री तथा उनीहरुका परिवारका सदस्य घरमै कैद गरिएका छन्। प्रधानमन्त्री अब्दुल्ला हमदोक तथा चारजना मन्त्री गिरफ्तारीमा परेका छन्। उनीहरुलाई सेनाले अज्ञात स्थलमा राखेको बताइएको छ।

सुडानको सेनाले पछिल्लो घटनाक्रमबारे केही बताएको छैन। लोकतन्त्र समर्थक समूहले मानिसहरुलाई विरोध प्रदर्शनका लागि सडकमा उत्रिन अपिल गरेको छ।

दुई वर्षअघि उमर अल–बशीरको सत्ता हटाएर अन्तरिम सरकार गठन भएको थियो। त्यतिखेर देखि नै सेना र सरकारबीच टकरावको स्थिति रहँदै आएको थियो। 

सैनिक कू पछि सुडानको राजधानी खार्तुममा इन्टरनेट बन्द गरिएको छ। सामाजिक सञ्जालमा सेयर भइरहेका भिडियोमा आक्रोशित मानिसहरु सडकमा टायर बालेर प्रदर्शन गरिरहेका देखिन्छन्।

समाचार एजेन्सी रोयटर्सले एक प्रत्यक्षदर्शीलाई उद्धृत गर्दै भनेको छ, ‘खार्तुमका सडकमा सेना तथा अर्धसैनिक बल तैनाथ गरिएको छ र मानिसहरुको आवतजावतमा नियन्त्रण गरिएको छ।’ खार्तुम विमानस्थल बन्द भएपछि अन्तर्राष्ट्रिय उडानहरु बन्द गरिएका छन्।