युभेन्टस र इन्टरको बराबरी, रोमा र नापोलीले गोल गर्न सकेनन्

काठमाडौं- इटालियन फुटबल लिग सिरी ए अन्तर्गत आइतबार राति सम्पन्न खेलमा युभेन्टस र इन्टर मिलान १-१ गोलको बराबरीमा रोकिएका छन्।

इन्टर मिलानको सान सिरो मैदानमा आइतबार राति सम्पन्न खेलमा यी दुवै टोलीले बराबरी गर्दै १-१ अंक बाँडेका हुन्।

१७औं मिनेटमा गोल गर्दै घरेलु टिमका इडिन जेकोले खेलमा अग्रता बनाएका थिए। तर, निर्धारित समय सकिन १ मिनेटअघि फरवार्ड पाउलो डिबालाले पेनाल्टीमा पाएको अवसरलाई सदुपयोग गर्दै खेललाई बराबरीमा ल्याए।

त्यस्तै, आइतबार रातिकै अर्को खेलमा रोमा र नापोलीले गोलरहित बराबरी खेलेका छन्। रोमाको मैदानमा भएको खेलमा नापोलीले घरेलु टिमविरुद्ध पकड जमाए पनि गोल गर्न भने सकेन।

यससँगै यी दुई टिमले पनि १-१ अंक बाँडेका छन्। अहिले तालिकामा २५ अंक बनाएर नापोली शीर्षस्थानमा छ भने दोस्रो स्थानका एसी मिलानका पनि समान २५ अंक छ।

१८ अंक बनाएको इन्टर तेस्रो स्थानमा रहँदा १६ अंकका साथ रोमा चौथो स्थानमा छ। १५ अंकसँगै युभेन्टस छैटौं  स्थानमा छ।