इन्द्रावती गाउँपालिका उपाध्यक्ष मीरा अधिकारी लामाको निधन

काठमाडौं- सिन्धुपाल्चोकको इन्द्रावती गाउँपालिका उपाध्यक्ष मीरा अधिकारी लामाको शनिबार निधन भएको छ। ब्लड क्यान्सरबाट पीडित लामाको उपचारका क्रममा त्रिवि शिक्षण अस्पतालमा निधन भएको हो।

५१ वर्षीया लामा लामो समयदेखि ब्लड क्यान्सरबाट पीडित थिइन्। पछिल्लो तीन सातायता उनको त्रिवि शिक्षण अस्पतालमा उपचार भइरहेको  थियो। २०७४ को स्थानीय तह निर्वाचनमा उनी नेपाली कांग्रेसबाट गाउँपालिका उपाध्यक्ष निर्वाचित भएकी थिइन्।

कांग्रेस सिन्धुपाल्चोककी नेतृ रहेकी लामा जिल्ला समिति सदस्यसमेत थिइन्। उनले केही समय जिल्ला पार्टीको कार्यवाहक सभापतिको जिम्मेवारीसमेत बहन गरेकी थिइन्। 

लोकतान्त्रिक आन्दोलनमा सक्रिय लामा सिन्धुपाल्चोक कांग्रेसका सभापति विकास लामाकी धर्मपत्नी हुन्। दिवंगत लामाका तीन छोरी छन्। गाउँपालिका राष्ट्रिय महासंघ नेपाल, नेपाली कांग्रेस सिन्धुपाल्चोकलगायत विभिन्न संघसंस्थाले विज्ञप्ति प्रकाशित गरी लामाको निधनले नेपाली कांग्रेस पार्टीले कर्मठ नेतृत्व र इन्द्रावती गाउँपालिकाले असल जनप्रतिनिधि गुमाएकोमा शोक व्यक्त गरेका छन्।