राजेन्द्र पाण्डे सात महिनामात्रै मुख्यमन्त्री हुने, कांग्रेससँग आलोपालो गर्ने सहमति

काठमाडौं– नेकपा (एकीकृत समाजवादी)का नेता राजेन्द्र पाण्डे ७ महिना मात्रै बागमती प्रदेशको मुख्यमन्त्री बन्ने भएका छन्। बिहीबार गठबन्धनको बैठकमा कांग्रेससँग आलोपालो सरकारको नेतृत्व गर्ने सहमति भएसँगै उनी ७ महिना मात्रै मुख्यमन्त्री हुने निश्चित भएको हो।

अल्पमतमा परेकी मुख्यमन्त्री अष्टलक्ष्मी शाक्यको बर्हिगमनपछि समाजवादी र कांग्रेसले आलोपालो सत्ताको नेतृत्व गर्ने लिखित सहमति गरेका हुन्। प्रदेशसभाको निर्वाचन हुन अब करिब १४ महिना बाँकी छ । 

त्यसमध्ये ७ महिना एकीकृत समाजवादी र ७ महिना कांग्रेसले बागमती प्रदेश सरकारको नेतृत्व गर्ने सहमति भएको हो। पहिलो कार्यकालको नेतृत्व एकीकृत समाजवादीका तर्फबाट पाण्डेले गर्ने र दोस्रो कार्यकालको नेतृत्व कांग्रेस संसदीय दलका नेता इन्द्र बाँनियाले गर्नेछन्।

यसअघि समाजवादीका अध्यक्ष माधवकुमार नेपालले बागमती प्रदेश सरकारको नेतृत्व आफूहरुले गर्ने सहमति भइसकेको दाबी गरेका थिए। कांग्रेसले आफ्नो दाबी नछोडेपछि सहमहामन्त्री डाक्टर प्रकाशशरण महतको उपस्थितिमा बसेको बैठकले आलोपालो सरकारको नेतृत्व गर्ने सहमति जुटाएको हो।