मुख्यमन्त्री शाक्यले आजै विश्वासको मत लिने, यस्तो छ अंकगणित

काठमाडौं- बागमती प्रदेश सभाको बैठक आज बस्दै छ। दिउँसो १ बजे बस्ने बैठकबाट अल्पमतमा परेकी मुख्यमन्त्री अष्टलक्ष्मी शाक्यले विश्वासको मत लिने प्रक्रिया प्रारम्भ हुनेछ। प्रदेशसभा सचिवालयले विश्वासको मत लिनका लागि आन्तरिक तयारी गरेको जनाएको छ। 

सत्तारुढ नेकपा एमाले संसदीय दलले बिहिबारको प्रदेशसभा बैठक सार्न आग्रह गरे पनि बैठक बस्ने भएको हो। विपक्षी गठबन्धनले सदन चलाएर मुख्यमन्त्रीले विश्वासको मत लिने प्रक्रिया अगाडि बढाउन सभामुख सानुकुमार श्रेष्ठलाई आग्रह गरेको छ। सोहिबमोजिमत आज मत विभाजन हुने भएको छ। आफूहरुको आग्रहविपरित बैठक राखेपनि बैठक उपस्थित भएर संसदीय प्रक्रियामा भाग लिने एमाले प्रदेशसभा सदस्य रामेश्वर फुयाँलले बताए। 

मुख्यमन्त्री शाक्यले गत असोज २४ गतेको प्रदेशसभाको बैठकमा नेपालको संविधानको धारा-१८८ को उपधारा १ बमोजिमको प्रावधानअनुसार विश्वासको मत लिने कार्यका लागि प्रस्ताव पेश गरेकी थिइन्। तर, विपक्षी गठबन्धनले मुख्यमन्त्रीको टुंगो नलागउँदा दलहरुबीचको सहमतिमा प्रदेशसभाको बैठक सारिएको थियो। 

गत २ भदौमा मुख्यमन्त्री नियुक्त हुनु भएकी शाक्य एमाले विभाजनपछि अल्पमतमा परेकी हुन्। बागमतीको प्रदेश सभामा एक सय नौ सदस्य रहेकोमा बहुमतका लागि कम्तीमा ५५ सांसदको समर्थन आवश्यक हुन्छ। पार्टी विभाजनपछि प्रदेश सभामा एमालेका ४३ सांसद छन्। बागमती प्रदेश सभामा माओवादी केन्द्रको २३, कांग्रेसको २२, नेकपा एकीकृत समाजवादीका १३ सांसद छन्।