टोटेनहमसँग पराजित न्युकासलको नयाँ युगमा दुखद् सुरुवात

काठमाडौं- इंग्लिस प्रिमियर लिग क्लब न्युकासललाई भर्खरै मात्र अरबी कम्पनीले खरिद गरेको छ। तर नयाँ मालिकसँग प्रशिक्षक स्टिभ ब्रुसको टिमले पहिलो खेलमै हार बेहोरेको छ। क्लबमा साउदी अरेबियाको नागरिक लगानी कोषले किनेपछिको युग नै हारबाट सुरुआत भएको हो।

कोषको मुख्य पदमा साउदी अरेबियाका राजकुमार रहेकाले र त्यहाँको मानव अधिकारसँग जोडेर कतिपय न्युकासल समर्थकले यो विक्री सम्झौताको आलोचना पनि गरेका थिए।

यता, आइतबार राति न्युकासलकै मैदानमा सम्पन्न खेलमा उसले चाहिँ पहुना टोली टोटेनहमसँग ३–२ गोलको हार बेहोर्यो।

क्लबका नयाँ अध्यक्ष यासिर अल रुमयान र क्लबमा लगानीकर्तासमेत रहेका अमन्डा स्टेविलेल पनि खेलमा उपस्थित भए। तर क्लबले पहिलो खेलमा आफ्ना मालिकलाई सन्तुष्ट बनाउन सकेन।

खेलको दोस्रो मिनेटमै विल्सनले गोल गरेपछि घरेलु टिमले अग्रता बनाएको थियो। तर १७ औं मिनेटमा टंगुव एनडोम्बेलेले खेलमा बराबरी गरिहाले। १–१ को बराबरीको अवस्थामा ह्यारी केनले गोल गर्दै घरेलु समर्थकलाई शान्त बनाएका थिए।

यता पहिलो हाफकै इन्ज्युरी समयमा टोटेनहमका अर्का फरवार्ड सन ह्युङ मिनले गोल गरेपछि टोटेनहमले एक गोलले पछि परेको अवस्थाबाट ३–१ को अग्रता बनाएको थियो।

यता, खेलको ८३ औं मिनेटमा टोटेनहमका इरिक डायरले आफ्नै पोस्टमा गोल गरेपछि खेलको नतिजा ३–२ गोलअन्तरले टोटेनहमका पक्षमा रह्यो। त्यसअघि ८३ औं मिनेटमै न्युकासलका जोन्जो शेल्वीले रातो कार्ड बोहोदै मैदानबाट बाहिरिएका थिए।

यो जितसँगै १५ अंक बनाएको टोटेनहम ईपीएल अंकतालिकाको पाँचौ स्थानमा छ। पराजित न्युकासल भने रेलिगेसन जोनमा छ।