सिरी एमा इन्टर मिलान पराजित, अर्को खेलमा एसी मिलानको जित

काठमाडौं- इटालियन सिरी ए को उपाधि दावेदार इन्टर मिलानले शनिबार राति हार बेहोरेको छ। लाजियोको मैदानमा सम्पन्न खेलमा पाहुना टिम इन्टर मिलानले घरेलु टिमसँग ३–१ गोलको हार बेहोरेको हो।

लाजियोको जितका लागि सिरो इमोबिले, फिलिपे एन्डर्सन र सर्गेज साविचले गोल गरेका थिए। खेलको इन्ज्युरी समयको सातौं मिनेटमा लाजियोका लुइज फिलिपे रोमासले रातो कार्ड पाएपछि उनी लाजियो अन्तिम सममा १० खेलाडीमा समेटिएको थियो।

यता, इन्टर मिलानका इभान पोरिसिचले १२ औं मिनेटमा पेनाल्टीमा पाएको अवसरको सदुपयोग गर्दै गोल गरेका थिए। उनको गोलसँगै मिलानले पहिलो हाफमा एक गोलको अग्रता बनाएको थियो। यता लाजियोले दोस्रो हाफमा पुनरागमन जित निकालेको हो।

सिरी ए एक अर्को खेलमा एसी मिलानले वेरोनालाई ३–२ गोलले हराएको छ। वेरोनाले पहिलो हाफमा बनाएको २–० गोलको अग्रता तोड्दै एसी मिलानले ३–२ गोलको जित निकालेको हो।

मिलानको जितका लागि ओलिभिए जिरु र फ्रांक केसीले गोल गरे। यता वेरोनाका कोरय जुन्टरले आफ्नै पोस्टमा गोल गरेपछि खेलमा मिलानले पुनरागमन जित निकालेको हो।

एसी मिलानले तिनै गोल दोस्रो हाफमा गरेको थियो। त्यसअघि पहिलो हाफको सातौ मिनेटमा र २४ औं मिनेटमा गोल गर्दै वेरोनाले अग्रता बनाएको थियो।