विश्वकप छनोटमा पेरुविरुद्ध अर्जेन्टिनाको जित

काठमाडौं– अर्को वर्ष कतारमा हुने फिफा विश्वकपको दक्षिण अमेरिकी छनोटमा अर्जेन्टिनाले जित निकालेको छ। अर्जेन्टिनाको घरेलु मैदानमा शुक्रबार विहान सम्पन्न खेलमा घरेलु टोलीले पाहुना टिम पोरुलाई १–० गोलअन्तरले हराएको हो।

अर्जेन्टिनाको जितमा लाउतारो मार्टिनेजले खेलको ४३ औं मिनेटमा गरेको गोल नै निर्णायक बन्यो। मार्टिनेजको गोलसँगै अर्जेन्टिनाले पहिलो हाफमा एक गोलको अग्रता बनाएको थियो। दोस्रो हाफमा दुवै टिमबाट गोल हुन नसक्दा अर्जेन्टिनाले जित निकालेको हो। सुरुआति रोजाइमा लियोनेल मेस्सीसहित मैदान उत्रिएको टिमले खेल अवधिभर ६८ प्रतिसत समय बलमा नियन्त्रण बनाउँदै जित निकालेको हो।

खेलका दौरान अर्जेन्टिनाले विपक्षीको पोस्टतर्फ ७ प्रहार गरेको थियो भने पेरुले चार प्रहार गरेको थियो। पेरुका कुनै प्रहारले नेटको जाली चुम्न सकेन। यो जितसँगै ११ खेलबाट २५ अंक बनाएको अर्जेन्टिना छनोटको दोस्रो स्थानमा छ। पेरु भने ११ अंकका साथ नवौं स्थानमा छ।