जिब्राल्टरको पोस्टमा नेदरल्यान्ड्सको आधा दर्जन गोल

काठमाडौं- अर्को वर्ष कतारमा हुने फिफा विश्वकप छनोटअन्तर्गत आइतबार राति सम्पन्न खेलमा नेदरल्यान्ड्सले जिब्राल्टरविरुद्ध सानदार जित निकालेको छ। नेदरल्यान्ड्सको रोटरडमस्थित डि कुप रंगशालामा भएको खेलमा उसले पाहुना टिम जिब्राल्टरविरुद्ध आधा दर्जन गोल गरेको हो।

खेलको ९  मिनेटमै डिफेन्डर भर्जिल भान डाइकले गोल गर्न सुरु गरेपछि नेदरल्यान्ड्सले पहिलो हाफमा तीन र दोस्रो हाफमा तीन गोल गर्यो। यससँगै जिब्राल्टरले ६–० गोलको हार बेहोरेको हो।

नेदरल्यान्ड्सका लागि मेम्फिस डिपाएले २१ औं मिनेटमा पहिलो र इन्ज्युरी समयमा दोस्रो गोल गरे। त्यो गोलसँगै नेदरल्यान्ड्सले ३–० गोलको अग्रता बनायो।

दोस्रो हाफको ४८ औं मिनेटमा डेन्जल डमफ्रिजले, अनाउट डन्जुमाले ७५ औं मिनेटमा  र डोनयल मलिनले ८६ औं मिनेटमा गोल गरेका थिए।

त्यो सानदार जितसँगै नेदरल्यान्ड्सले समूह जीको शीर्षस्थानमा २ अंकको अग्रता बनाएको छ। उसको १९ अंक हुँदा पराजित जिब्राल्टर शून्य अंकका साथ समूह जीको अन्तिममा छ। सोही समूहको अर्को खेलमा नर्वेले मोन्टेन्ग्रोलाई २–० गोलले हराएको छ।