बराबरीमा रोकियो ब्राजिल, तोडियो शतप्रतिशत जितको यात्रा

काठमाडौं– अर्को वर्ष कतारमा हुने फिफा विश्वकपको दक्षिण अमेरिकी छनोटअन्तर्गत सोमाबार बिहान सम्पन्न खेलमा ब्राजिलले बराबरी खेलेको छ।

कोलम्बियाको घरेलु मैदानमा सोमाबार सम्पन्न खेलमा ब्राजिलले पहिलो पटक बराबरी खेलेको हो। निर्धारित ९० मिनेटसम्म दुवै टिमबाट गोल हुन नसक्दा खेल गोलरहित बराबरीमा सकियो।

ब्राजिलले खेल अवधिभर अधिक समयमा नियन्त्रण बनाउँदै कोलम्बिया माथि दबाब बनाए पनि उसले गोल गरेन। यता, बलमा थोरै नियन्त्रण राखे पनि कोलम्बियाले विपक्षीको पोस्टमा धेरै प्रहार गरेको थियो।

ब्राजिलले कोलम्बियोको पोस्टतर्फ ९ प्रहार गर्‍यो भने कोलम्बियाले १२ प्रहार गरेको थियो। यो बराबरीसँगै, ९ खेलसम्म शतप्रतिशत जित निकालेको ब्राजिलले जारी छनोटमा पहिलो खेलमा जित निकाल्न नसकेको हो। उसले अहिले १० खेलबाट २८ अंक जोडेको छ।

ऊ अहिले शीर्षस्थानमा छ। यता, कोलम्बिया भने १५ अंकका साथ पाँचौं स्थानमा छ। दक्षिण अमेरिकी छनोटमा अहिले अर्जेन्टिनाले उरुग्वेको सामना गरिरहेको छ।