बागमतीका मुख्यमन्त्रीले विश्‍वासको मत लिने प्रस्ताव टेबल, मत विभाजन दसैंपछि

मकवानपुर- बागमती प्रदेशका मुख्यमन्त्री अष्टलक्ष्मी शाक्यले सदनबाट विश्वासको मत लिने प्रस्ताव आइतबारको प्रदेशसभा बैठकमा टेबल भएको छ। तर, मत विभाजन प्रक्रिया भने अर्को बैठकमा गरिने भएसँगै उनको सत्ता एक साता लम्बिएको हो। 

मुख्यमन्त्री शाक्य उपाध्यक्ष रहेको एमाले विभाजन भएर नेकपा एकीकृत समाजवादी गठन भएसँगै शाक्यले विश्वासको मत लिनुपर्ने अवस्था सिर्जना भएको हो। ्

अल्पमतमा परेकी मुख्यमन्त्रीले असोज २५ गतेसम्ममा विश्वासको मत लिनुपर्ने कानुनी बाध्यता भए पनि दलहरुको सहमतिमा कात्तिकको पहिलो हप्तामात्र मत विभाजन गर्ने तयारी गरेको प्रदेशसभा सचिवालयले गरेको छ।

सत्तापक्षको आग्रह अनुसार दसैंपछि मत विभाजन गर्ने विपक्षी दलहरु सहमत हुन्। सभामुख सानुकुमार श्रेष्ठले आह्वान गरेको सर्वदलीय र कार्यव्यवस्था तथा परामर्श समिति बैठकमा दसैंपछि विश्वासको मत लिने सहमति भएको थियो।

एमालेको एकल बहुमतबाट मुख्यमन्त्री बनेकी शाक्य पार्टी विभाजनमा १३ सांसदले नेकपा एस रोजेपछि अल्पमतमा परेकी थिइन्।