दुई नाबालक छोरासहित आमाले गरिन् आत्महत्या

जनकपुरधाम- धनुषामा एक महिलाले दुई नाबालक छोरासहित आत्महत्या गरेकी छन्। जिल्लाको नगराइन नगरपालिका–४ लगमा बस्ने गुरुदेव साहकी श्रीमती गुडियादेवी साहले दुई छोराको हत्यापछि आफूले आत्महत्या गरेको प्रहरीले जनाएको छ।

५ वर्षीय छोरा अभिषेक र ३ वर्षीय छोरा आदित्यलाई घाँटी कसेर हत्या गरिसकेपछि गुडिया आफूले पनि पासो लगाएर आत्महत्या गरेको पाइएको प्रहरीले जनाएको छ।

जिल्ला प्रहरी कार्यालय धनुषाका डिएसपी जितेन्द्र बस्नेतका अनुसार प्रारम्भिक अनुसन्धानबाट श्रीमान घर बाहिर रहेको बेला उनले घटना घटाएकी हुन्।

'उनका श्रीमान मजदूरी गर्न गएको समयमा घटना घटाइएको पाइएको छ।  घटनाअघि तीन बजेतिर उनले कतिखेर घर फर्कने भनेर कल गरेको देखिन्छ', डिएसपी बस्नेतले भने।

प्रेम विवाह गरेका गुडियाको माइती पक्षले हालसम्म स्वीकार गरेको थिएन। प्रहरीले घटनाबारे अनुसन्धान गरिरहेको जनाएको छ।