आंशिकरूपमा खुल्यो कोरिया रोजगारी, कात्तिक १० गतेदेखि प्रतिबद्ध श्रमिक जान पाउने

काठमाडौं- कोरोना महामारीका कारण दुई वर्षदेखि रोकिएको रोजगारीका लागि दक्षिण कोरिया जाने क्रम आंशिक रूपमा खुलेको छ। कोरिया र नेपाल सरकारले संयुक्त रूपमा तयार गरेको स्वास्थ्य मापदण्ड पूरा गरेका प्रतिबद्ध श्रमिकलाई आगामी कात्तिक १० गतेदेखि लगिने भएको हो। 

प्रतिबद्ध श्रमिक भनेको कोरियामा रोजगारीका क्रममा एकै रोजगारदातासँग नियमित तीन वर्षदेखि चार वर्ष १० महिना काम गरेर पुनः रोजगारीका लागि अनुमति पाएका श्रमिक हुन्। यस्ता १ सय १९ प्रतिबद्ध श्रमिकको भिसा प्रक्रियाका लागि वैदेशिक रोजगार विभाग ईपीएस कोरिया शाखाले नामावलीसमेत सार्वजनिक गरेको छ। 

शाखाका अनुसार तयारीमा रहेका ११९ श्रमिकमध्ये अधिकांश २०१९ को अक्टोबर, नोभेम्बर र डिसेम्बरमा नेपाल आएका प्रतिबद्ध श्रमिक छन्। ईपीएस शाखाका निर्देशक सुरेश राउतले भिसा आएका प्रतिबद्ध श्रमिकमध्ये आगामी कात्तिक १० गते ५० जनाको काठमाडौंबाट कोरिया सिधै उडान हुने जानकारी दिए। यसैगरी बाँकी रहेका ६७ जनाको लगत्तै एक सातामा उडान हुने पनि उनले बताए। 

नेपाली श्रमिक माग गर्ने सम्बन्धमा कोरियाली पक्षले राखेको कोरोना बिमा, पीसीआर परीक्षण, सीधा हवाई उडान र १४ दिन कोरियामा क्वारेनटाइन बस्नुपर्नेलगायतका मापदण्ड पूरा गर्नु पर्ने सर्त राखेको थियो। उक्त सर्त पूरा भएपछि नेपाली श्रमिक कोरिया जाने बाटो खुलेको हो। 

कोरिया जाने बाटो खुले पनि कामदारहरूले ठूलो रकम खर्च गर्नुपर्ने बाध्यता छ। कोरिया जाने कामदारले कोरियामा १४ दिन होटेल क्वारेनटाइन बस्नुपर्छ। त्यसका लागि १५ सय डलर खर्च कामदारले नै बेहोर्नुपर्छ। 

त्यस अतिरिक्त खुला बजारमा तोकिएको हवाई भाडासमेत कामदारले बेहोर्नुपर्ने बाध्यता छ। यसअघि कोरिया जान ४११ डलर मात्र तिर्नुपर्थ्यो। क्वारेनटाइन र हवाई टिकटको खर्च भने प्रतिबद्ध कामदारले पनि बेहोर्नुपर्छ।