आठ जिल्लाको परिणाम आउँदा देउवा र पौडेल पक्षको बराबरी

काठमाडौं– नेपाली कांग्रेसको १४ औं महाधिवेशन अन्तर्गत भइरहेका जिल्ला अधिवेशनको नतिजा आउन थालेको छ। हालसम्म ८ वटा जिल्लाको नतिजा आएको छ। प्राप्त नतिजा अनुसार संस्थापन समूहले चार जिल्लामा सभापति जितेको छ भने  संस्थापन इतर समूहले पनि चार जिल्लामै सभापति जितेको छ। 

सभापति देउवा समूहले  मनाङ, हुम्ला, ताप्लेजुङ र रामेछापमा सभापति जितेको छ। वरिष्ठ नेता रामचन्द्र पौडेल पौडेल पक्षले भने मुस्ताङ, रुकुम पूर्व, कालीकोट र संखुवासभामा सभापति जितेको छ।

देउवा पक्षका मनाङमा शंकर गुरुङ, हुम्लामा मोहनविक्रम सिंह, ताप्लेजुङमा गजेन्द्रप्रसाद तुम्याहाङ र रामेछापमा पूर्णबहादुर (कान्छाराम) तामाङ सभापतिमा निर्वाचित भएका छन्। पौडेल पक्षबाट मुस्ताङमा रोमी गौचन थकाली, रुकुम पूर्वमा केशरमान रोका, कालीकोटमा अम्मबहादुर शाही र संखुवासभामा दीपक खड्का जिल्ला सभापति बनेका छन्।