शान्ति समाजले बुटवलमा मनायो अहिंसा दिवस

बुटवल- महात्मा गान्धीको जन्मदिनमा मनाइने अहिंसा दिवस रुपन्देहीमा पनि मनाइएको छ। मानव अधिकार तथा शान्ति समाज ,रुपन्देहीले बुटवलमा शान्ति सन्देश सहित दिवस मनाएको हो। 

विश्वमै अहिंसाका लागि उदाहरणको रुपमा मानिएका भारतका गान्धीको जन्मदिन अक्टोबर २ तारिखमा यो दिवस मनाउने गरिन्छ। शान्ति सन्देश प्रदर्शनमा समाजका केन्द्रीय सभापति गोविन्द खनालले हिंसालाई निर्मूल गरी दिगो शान्तिका लागि सबैको ऐक्यवद्धता र प्रयास हुनुपर्ने बताए। उनले शान्ति कायम गर्नका लागि सबै राजनीतिक दलहरु इमान्दार बन्नुपर्नेमा जोड दिए। 

समाजका रुपन्देही अध्यक्ष डिपी खनालले शान्ति स्थापनाका लागि विशेषगरी युवाहरुको भूमिका महत्वपूर्ण हुने बताउँदै हिंसारहित समाज र राष्ट्र निर्माणमा जुट्न अपिल गरे।  ‘अंहिसा पवित्र एवम् गौरवमय मार्ग’ भन्ने नाराका साथ अहिंसा दिवस मनाइएको सचिव कपिल ज्ञवालीले जानकारी दिए।