पविन र सुरोजको जोडी क्वाटरफाइनलमा

काठमाडौं- आयोजक बालकुमारी रिमिक्स क्लबका पविन लिन्थेप र सुरोज महर्जनको जोडी बालकुमारी रिमिक्स क्लब सातौँ ललितपुर जिल्लाव्यापी ब्याडमिन्टन प्रतियोगिता २०७८ को क्वाटरफाईनलमा प्रवेश गरेका छन्। शुक्रबार सम्पन्न खेलमा ठेचो ब्याडमिन्टन क्लबका विशाल बस्नेत र इन्द्र कार्कीको जोडी २१–१५, २१–१६ को सोझो सेटमा पराजित गर्दै आयोजकले अन्तिम आठमा स्थान बनाउन सफल भएको हो। 

आयोजकको आफ्नै कभर्डहलमा भएको प्रतियोगितामा प्रयाग पोखरी ब्याडमिन्टन क्लबका उज्वल दाहाल र सृजन ताम्राकारले जोडीले पनि जित निकालेका छन्। उक्त जोडीले इमाडोल ब्याडमिन्टन स्पोर्टस्का राजु घिमिरे र प्रविन कार्कीको जोडीलाई २१–१७, २१–१२ ले पराजित गदै क्वाटरफाइनलमा स्थान बनाए। 

यस्तै, क्वाटरफाईनलमा स्थान बनाउने क्रममा आयोजकका दिपन महर्जन र भुवन श्रेष्ठको जोडीले क्लब ७ का बिकास महर्जन र प्रदीप महर्जनको जोडीलाई २१–११, २१–१६ तथा दिप्रिस मुनी बज्राचार्य र सुमन शाक्यको जोडीले इमाडोल ब्याडमिन्टन स्पोर्टस्का तीर्थराज दर्लामी र दिपेश गुरुङ्गको जोडीलाई २१–५, २१–१३ ले, ११ स्टारका राजु बज्राचार्य र आकाश छन्त्यालको जोडीले आयोजकका जेम्स अवाले र राजेन्द्र महर्जनको जोडीलाई २१–१४, २१–१९ले, तथा आयोजकका दिपेश शाक्य र सुनील शाक्यको जोडीले रिभाईभ लिजर पार्कका राम केसी र अजय थापाको जोडीलाई २१–८ को समान अन्तरले पराजित गर्दै अन्तिम आठमा स्थान बनाए।

भेट्रान्स ४५ माथिको प्रतियोगितामा श्रीकृष्ण ब्याडमिन्टन क्लबका सुरेश बस्नेत र सीताराम श्रेष्ठको जोडी, महालक्ष्मी टोल विकासका रञ्जित घतानी र रामु ताम्राकार, आयोजकका हरि महर्जन र रवि महर्जन, इमाडोल ब्याडमिन्टन स्पोर्टसका तिलक बुढाथोकी र दील बहादुर कदङ्गवा, आयोजकका किशोर व्यञ्जनकार र दिलन महर्जन, फ्रेन्डसिप ब्याडमिन्टन क्लबका सानुबाबु महर्जन र राजकुमार राजकर्णिकार, सनराइज ब्याडमिन्टन क्लबका दीपक राना र टिका थापा तथा आयोजकका पूर्णभक्त चित्रकार र सुगत रत्न शाक्यको जोडीले पनि अन्तिम आठमा स्थान बनाए।

प्रतियोगिताको फाइनल खेल भोलि शनिबार हुने कार्यक्रम रहेको छ।