टोकियो ओलम्पिक : गौरिकाको प्रतिस्पर्धा आज

काठमाडौं-  जापानको राजधानी टोकियोमा जारी ३२औं ग्रीष्मकालीन ओलम्पिक खेलकूदमा आज नेपालकी गौरिका सिंहले प्रतिस्पर्धा गर्ने भएकी छन्।

ओलम्पिकअन्तर्गत पौडी खेलाडी गौरिका सिंहले प्रतिस्पर्धा गर्न लागेकी हुन्। गौरिका महिला १०० मिटर फ्रिस्टाइलमा प्रतिस्पर्धा गर्ने छिन्। गौरिकाको खेल नेपाली समय अनुसार बुधबार दिउँसो ३:४५ बजे सुरु हुनेछ।

टोकियो एक्वेटिक सेन्टरमा हुने प्रतिस्पर्धामा गौरिका हिट १ मा रहेकी छिन्। यस हिटमा ४ खेलाडी छन्। गौरिका रहेको हिटमा नाइजेरिया, मोन्टेनेग्रो र गुवामका खेलाडी रहेका छन्।

उनीसँगै नेपालबाट चार खेलमा पाँच खेलाडी टोकियो ओलम्पिकमा सहभागी भएका छन्। तीमध्ये सुटिङकी  कल्पना परियार, जुडोकी सोनिया भट्ट, पौडीका एलेक्स शाहले खेलिसकेका छन्। तीनै जना पराजित भई प्रतियोगिताबाट बाहिरिएका छन्। परियारले महिला १० मिटर एयर राइफल, भट्टले महिला ४८ किलो तौल समूह तथा शाहले एक सय मिटर फ्रिस्टाइलमा प्रतिस्पर्धा गरेका थिए।

अब पौडीकी गौरिका र एथलेटिक्सकी सरस्वती चौधरीले प्रतिस्पर्धा गर्न बाँकी छ। चौधरीले महिला १०० मिटर दौडमा प्रतिस्पर्धा गर्ने छिन्। चौधरीले शुक्रबार आ–आफ्नो खेलमा प्रतिस्पर्धा कार्यतालिका रहेको छ।