खाली रंगशालामा सुरु भयो टोक्यो ओलम्पिक

काठमाडौं- टोक्यो ओलम्पिक २०२० शुभारम्भ भएको छ। जापानको राजधानी टोक्योस्थित ओलम्पिक भिलेजको खाली रंगशालामा ओलम्पिकको शुभारम्भ भएको हो।

खेलकुदको महाकुम्भ मानिने ओलम्पिकको उद्घाटन समोरोहमा यसपटक एक हजारभन्दा कम दर्शकलाई उपस्थितिको अनुमति दिइएको छ। जापानका सम्राट नरुहितोले खेलको औपचारिक उद्घाटन गरेका छन्।

जापान ओलम्पिकमा ओलम्पिक मशाल प्रज्वलित गर्ने खेलाडीको नाम गोप्य राखिएको छ। खेल सुरु भएपछि आयोजनालाई लिएर जारी आलोचना कम हुने अपेक्षा आयोजकले राखेको छ। 

कोरोना भाइरसको महामारीका कारण ठिक एक वर्ष पछाडि धकेलिएको टोक्यो ओलम्पिक अहिले पनि महामारीकै बीचमा हुन लागेको हो।

जापानमा महामारीका बीचमा ओलम्पिक गर्न लागिएको भन्दै लामो समयदेखि विरोध जारी छ। आयोजकले कडा सुरक्षा सतर्कताबीच ओलम्पिक खेलहरु आयोजना गरेको छ।

प्रतियोगितामा भाग लिन आउने खेलाडी तथा विभिन्न देशका अफिसियलहरुको पटकपटक कोरोना परीक्षण भइरहेको छ। हालसम्म यसरी भाग लिन आएका ९० भन्दा बढीमा कोरोना पुष्टि वा कन्ट्याक्ट ट्रेसिङको मामिला देखा परेको जनाइएको छ।

टोक्यो ओलम्पिकमा नेपालबाट ४ खेलमा ५ खेलाडी सहभागी हुँदैछन्।