टोक्यो ओलम्पिकमा जानेलाई राष्ट्रपतिले गरिन् बिदाइ

काठमाडौं- टोक्यो ओलम्पिक २०२० मा सहभागी हुने नेपाली खेलाडी, प्रशिक्षक र अफिसियलसहितको टिमलाई राष्ट्रपति विद्यादेवी भण्डारीले बिदाइ गरेकी छन्। 

२३ जुलाईमा सुरु हुने ओलम्पिकमा पाँच नेपाली खेलाडीले प्रतिस्पर्धा गर्नेछन्। नेपालबाट पौडीमा एलेक्स शाह र गौरिका सिंह सहभागी बन्नेछन्। शाह र सिंह भने प्रशिक्षकसहित जापान पुगिसकेका छन्। 

उनीहरु पहिलो चरणमा नै जापान प्रस्थान गरेका थिए। त्यसबाहेकको टिमलाई भने राष्ट्रपति भण्डारीले बिदाइ गरेकी हुन्। ओलम्पिकमा जुडोकी सोनिया भट्ट, सुटिङकी कल्पना परियार र एथ्लटिक्सकी सरस्वती चौधरीले प्रतिस्पर्धा गर्नेछन्।

जुडो प्रशिक्षक सूर्यनारायण श्रेष्ठ तथा सुटिङ प्रशिक्षक असिम यादव तथा राखेप सदस्य सचिव रमेश कुमार सिलवाल टोक्यो जानेछन्। टोक्यो ओलम्पिकमा पाँच खेलाडी, प्रशिक्षक र पदाधिकारीसहित नेपालको भ्रमण टोलीमा २६ जना सहभागी हुनेछन्।