एटीएमको १२ लाख मुसाले खाएपछि...

आसाम- भारतको पूर्वोत्तर राज्य आसाममा एउटा एटीएममा राखिएको १२ लाखभन्दा बढी मुसाले काटेको छ। 

एटीएम मेसिन नचलेपछि जाँच गर्न गएका  प्राविधिकहरूले हेर्दा १२ लाखभन्दा धेरै रुपैयाँ काटिएको अवस्थामा भेटिएको हो। 

तीनसुकिया जिल्लास्थित स्टेट ब्याङ्क अफ इन्डियाको एक एटीएममा पाँच सय र दुई हजार दरका ती नोटहरू मुसाले काटेको प्रहरीले अनुमान गरेको छ।

हिन्दुस्तान टाइम्स पत्रिकाका अनुसार तार लैजान पारिएको एउटा प्वालबाट मुसाहरू छिरेको अनुमान प्रहरीको छ। मुसाले काटेका नोटको थुप्रोका तस्बिरहरू धेरैले सामाजिक सञ्जालमा हालेका छन्।

त्यस्तै एउटा तस्बिरमा एउटा मरेको मुसो फोहोरको खातमा पल्टेको देखिन्छ। एक जना प्रहरी अधिकारीलाई उद्धृत गर्दै हिन्दुस्तान टाइम्सले उक्त एटीएमले १२ दिनदेखि काम नगरेको बताएको छ।

प्राविधिकहरूले झन्डै १७ लाख भारतीय रुपैयाँ भने सकुशल निकालेको बताइएको छ।