सत्तापक्षकै सांसदले भने : सरकारमा दलालको बिगबिगी

धनगढी- अछाम क्षेत्र नम्बर १ प्रदेश सभा २ का सांसद अक्कल रावलले सामाजिक सञ्जाल फेसबुकमै बजेटबारे असन्तुष्टि व्यक्त गर्दै लेखेका छन्-'दलालको कति बिगबिगी रहेछ । बजेटका शिर्षक हेर्दा पो थाहा हुन्छ' उनले थप लेखेका छन् -'हामी बिचरा निरिह माननीय भएका छौ, बेइमानिको अगाडी स्वाभिमानी हार्ने देशका एक हुल हामी सांसदहरु ।'


प्रदेश ७ सरकारले आगामी आर्थिक बर्षका लागि ल्याएको बजेटप्रति प्रतिपक्ष सांसदहरुको भन्दा चर्को बिरोध सत्तापक्षकै सांसदहरुको छ ।

अर्थमन्त्रीले आफ्नो क्षेत्रमा मात्र बजेट खन्याएको भन्दै सत्तापक्षका सांसदले बजेटप्रति असन्तुष्टि जनाएका हुन् । अछामकै क्षेत्र नम्बर-१ प्रदेशसभा-१ का नेकपाका सांसद हर्क कुँवरले बजेटमा अर्थमन्त्रीको क्षेत्रमा मात्र धेरै योजनाहरु समेटिएको भन्दै अरु सांसदले सिफारिश गरेका योजनाहरु बजेटममा नसमेटिएको बताए ।

उनले आफ्नो खल्तीका मानिसहरुको योजना रातो किताबमा पारेको तर अत्यावश्यक सांसदको सिफारिसमा आएका योजनाहरु नपारेको गुनासो गरे । कुवरले भने- 'मन्त्रीज्युले हामीलाई के सम्झनु भो ? आफ्नो निर्वाचन क्षेत्र बजेट केन्द्रित गर्नु भयो हाम्रोमा शुन्य ।'

सत्ता पक्षकै सांसद दुर्गा विकले भनिन्-'अर्थमन्त्री बोहरा सबै जनताका मन्त्री हुन् उनले आफ्नो निर्वाचन क्षेत्रलाई बढी प्राथमिकता दिएका छन् । अछाम भित्रकै अरु क्षेत्रलाई बजेटमा उपेक्षित गरिएको छ ।'

बजेट पारित भए पछि मात्रै रातो किताब सांसदलाई उपलब्ध गराउन खोजेका अर्थमन्त्री भने त्यसमा चुकेका छन् । सांसदहरुले बजेटको छलफल अगाबै रातो किताब उपलब्ध गराउन माग गरेपछि उनले बाध्य भएर रातो किताब उपलब्ध गराएको सांसदले विकले बताईन ।

असार ४ गते बजेट माथिको छलफल कार्यक्रममा सरकारको बचाउ गर्न खोजेका सांसदहरुले घुमाउरो तरिकाले संसदमा मन्त्रीलाई झटारो हानेका थिए । रातो किताब नपढेरै सोमबार संसदमा बोल्ने सत्तापक्षकै सांसदहरुले रातो किताब पढेपछि अथमन्त्रीलाई चौतर्फी दवाब दिई रहेका छन् । रातो किताब बैठक पश्चात अध्ययन गर्ने सत्तापक्षकै सांसदहरुले बैठक लम्व्याउन समेत दवाव दिएको श्रोतले जनाएको छ । सांसद विकले भनिन्-'अर्थमन्त्री ज्युले रातो किताब नसच्याए बजेट पारित हुन दिन्नौं । मन्त्रीलाई बजेट सच्चाउन हामीले आग्रह गरिरहेका छौं ।'    

प्रदेश-७ को सरकारले ल्याएको २५ वर्ष ६ करोड रुपैयाँ बराबरको बजेटमाथि सोमबारदेखि प्रदेशसभामा छलफल सुरु गरेको छ । असार १ गते सार्वजनिक गरिएको बजेटमाथिको छलफलमा भाग लिने प्रतिपक्षका प्रदेशसभा सदस्यले बजेटको कडा आलोचना गरेका छन् भने रातो किताब पढेपछि सत्तापक्षका सांसदले बजेटको चर्को विरोध आएको छ ।