नेप्से घटे पनि लघुवित्तमा आकर्षण

काठमाडौं- पुँजीबजार सूचक नेप्से ओरालो लागे पनि लघुवित्त उपसमूहका कम्पनीको सेयरमा लगानीकर्ताको आकर्षण देखिएको छ। मंगलबार बजारमा तीव्र उतारचढावका भई अधिकांश उपसमूहको सेयर मूल्य घटे पनि लघुवित्त उपसमूहको सेयर २६.४ बिन्दुले उकालो लागेको छ। नेप्से भने ४७.४९ बिन्दुले घटेर २८२८ मा ओर्लेको छ।

यस्तै, ठूला कम्पनीको सेयर कारोवार मापन गर्ने सेन्सेटिभ परिसूचक ९.८७ बिन्दुले घटेर ५२३.७० मा सिमित भयो। कूल २२३ कम्पनीको एक करोड ४० लाख ४४ हजार ३८१ कित्ता सेयर रु छ अर्ब ७२ करोड ६३ लाख ६१ हजार ८६९ मूल्यमा खरिद बिक्री भए। 

कारोबार भएका १३ उपसमूहमध्ये लघुवित्त उपसमूहको मात्रै सेयर उकालो लागेको हो। बैंकिङ २६.४४, व्यापार ४७.५३, होटल तथा पर्यटन १.३२, विकास बैंक १६७.१३, जलविद्युत् ७६.०३, वित्त ८७.६१, निर्जीवन बीमा २५१.५३, उत्पादन ३४.९८, अन्य ५१.३३, जीवन बीमा १६५.९८, सामूहिक लगानी कोष ०.०७ र लगानी ३.८४ ले घट्दा लघुवित्त उपसमूह भने २६.४ बिन्दुले उकालो लाग्यो। 

कारोबारका आधारमा राधी विद्युत् कम्पनी शीर्षस्थानमा रहेको छ। सो कम्पनीको प्रतिकित्ता रु ७९० मा रु ४९ करोड ८३ लाख २५ हजार ९५० बराबरको कारोबार भयो। यस्तै, नेशनल हाइड्रोपावर रु ३६ करोड ७८ लाख ५० हजार ५०, एचआइडिसिएल रु २९ करोड ६७ लाख ५२ हजार ७४४, नेपाल इन्स्योरेन्स कम्पनी रु २३ करोड ९९ लाख ६८ हजार ३६० र नेपाल पुनरबीमा कम्पनी रु १६ करोड ५३ लाख ९९ हजार ६०७ बराबरको कारोवार भई शीर्ष स्थानमा रहे। 

ओरियन्टल होटल ५.७६, गुराँस लघुवित्त ४.२५, सामुदायिक लघुवित्त ३.६६, तारागाँउ रिजेन्सी होटल २.८४ र सिभिल लघुवित्तका लगानीकर्ताले २.७४ प्रतिशतले कमाए । त्यस्तै, प्रोगेसिभ फाइनान्स ८.५५, एचआइडिसिएल ८.०७, वेष्ट फाइनान्स कम्पनी ८.०१, श्री इन्भेष्टमेन्ट फाइनान्स ७.१८ र सेन्ट्रल फाइनान्सका लगानीकर्ताले ६.९० प्रतिशतले गुमाए।