सुविधा लिन नेपाली बालबालिका भारतीय विद्यालयमा भर्ना 

जनकपुरधाम- प्रदेश नम्बर दुईमा भारतसँग सीमा जोडिएका अधिकांस समुदायका बालबालिकाहरु सीमापारीका भारतीय विद्ययालयले दिने सुविधा लिन भर्ना हुने  क्रम बढेको छ ।

सदरमुकाम जनकपुरभन्दा करिब १२÷१३ किलोमिटर टाढा रहेको मुखियापट्टी मुसहरनीयाबाट भारतीय सीमा जोडिएको छ ।  नजिकै पर्ने भारतीय विद्यालयहरु निशुल्क पाठ्यपुस्त, पोसाक, खाना, खाजालगायतका सुविधा दिने भएकोले बालबालिकालाई भर्ना गराउने क्रम बढीरहेको छ ।
 
एक स्थानीय शिक्षकका अनुसार आर्थिक रुपले कमजोर तथा कम शिक्षित अभिभावकहरु आफ्ना बालबालिकाहरुको भर्ना भारतीय विद्यालयमा गराउने गरेका छन् । 
त्यसैगरी गाउँको सरकारी विद्यालयमा भर्ना गराएपनि कतिपय विद्यार्थी नीजि विद्यालयमा समेत पढ्दै आइरहेका छन् ।

मुखियापट्टी मुसहरनीयास्थित राष्ट्रिय प्राथमिक विद्यालयका प्रधानाध्यापक सुरेन्द्र पाण्डेयले विद्यालयमा भर्ना भएपनि कतिपय नीजि र सीमापारीको विद्यालयमा समेत भर्ना गराएको जानकारी पाएको बताए । नीजि र सीमापारीका विद्यालयमा भर्ना भएपछि पाठ्य सामग्री वितरणमा समेत आफूहरुलाई समस्या आउने गरेको उनको भनाई छ ।

सरकारी विद्यालयबाट प्राप्त सेवा सुविधा लिन मात्र कतिपय भर्ना गरेको पाण्डेयले बताए । सरकारी विद्यालयबाट निःशुल्क पुस्तक र छात्रवृत्ति लिने तर विद्यालय नपुग्ने विद्यार्थीहरुको संख्या सीमा नजिकका गाउँमा धेरै रहेको  पाण्डेयले जानकारी दिए ।

भारतमा सरकारले चलाएको साक्षर अभियान सफल पार्न भारतले यस्तो नीति बनाएको छ । भारतीय नागरिकहरुको लागि भारत सरकारले यो सुविधा दिँदै आएको छ । तर, ती सुविधा लिन सीमावारीबाट नेपाली विद्यार्थीहररु समेत पुग्छन। अभिभावकरु पढाई भन्दा पनि निःशुल्क सेवा सुविधा लिन बालबालिकालाई पारीका विद्यालयहरुमा भर्ना गर्ने गरेको मुखियापट्टीस्थित विद्यालयको शिक्षकहरुको बुझाई छ ।

गाउँको विद्यालयमा भर्ना गराउने तर विद्यालय नआउने बालबालिकाहरुलाई पाठ्यपुस्तक उपलब्ध नगराएपछि अभिभावकहरु झगडा गरेर तनाव दिने गरेको विद्यालयका एक शिक्षकले बताए ।

सरकारी विद्यालयहरुमा विद्यार्थी टिकाउन विभिन्न सेवा सुविधा उपलब्ध रहेपनि पढाईको अवस्था राम्रो नभएकै कारण गाउँघरमा पनि अवैध नीजि विद्यालय फस्टाउँदै गएका छन् । सरोकारवाला निकायले अवैध तरिकाले सञ्चालित नीजि विद्यालयहरुमा कारबाही पनि गर्न सकेको छैन भने सेवासुविधाकै लोभमा सीमापारीका विद्यालयहरुमा भर्ना हुने विद्यार्थीलाई रोक्न सकेको छ ।

सेवा सरकारी विद्यालयबाट लिने तर पढाई नीजि विद्यालयमा गर्ने परिपाटी धनुषामा व्यापक रुपमा बढेको समाजिक विकास मन्त्रालयका उपसचिव दानीकान्त झा बताउँछन् । भर्ना सरकारीमा लिएका तर पढाई नीजि वा मदरसमा गर्दै आइरहेका विद्यार्थीको संख्या धनुषामा करिब ५ प्रतिशत रहेको तथ्यांक छ । अभिभावकहरु सरकारी विद्यालयलाई लाभ लिने स्थलको रुपमा मात्र प्रयोग गरेकाले यस्तो अवस्था आएको झाको भनाई छ ।