डा देवकोटाको अन्त्यष्टीमा सशस्त्रले सलामी दिने

काठमाडौं- वरिष्ठ न्यूरो सर्जन डा. उपेन्द्र देवकोटालाई राजकिय सम्मानका साथ आज अन्त्यष्टी गरिने भएको छ । उनको अन्त्येष्टिमा सशस्त्र प्रहरीको टुकडीले आर्यघाटमा सलामी दिने भएको छ ।

पूर्व विशिष्ठ व्यक्तिहरुको अन्त्येष्टिमा प्रदान गरिने सम्मान निर्देशिकाअनुसार पूर्वमन्त्रीका हैसियतमा डाक्टर देवकोटालाई सम्मान दिन लागिएको हो । उनी पूर्वस्वास्थ्यमन्त्री पनि हुन् । सोमबार निधन भएका डा देवकोटाको सरकारी सम्मानका साथ अन्त्यष्टी गर्ने निर्णय सरकारले गरेको थियो । 

उनको पार्थीव शरिर अन्तिम श्रद्धाञ्जलीका लागि अहिले बाँसबारीस्थित न्यूरो अस्पतालमा राखिएको छ । श्रद्धाञ्जली दिन विभिन्न क्षेत्रका प्रतिष्ठित व्यक्तित्वदेखि सहकर्मी र शुभचिन्तकहरूको भीड लागेको छ ।

उपराष्ट्रपति, पूर्वप्रधानमन्त्रीदेखि प्रधान सेनापतिसम्मले देवकोटाप्रति अन्तिम श्रद्धाञ्जली व्यक्त गरेका छन् । देवकोटालाई श्रद्धाञ्जली दिँदै गर्दा उनका  सहपाठीसमेत रहेका पूर्वप्रधानमन्त्री एवम् नयाँ शक्ति नेपालका संयोजक डा. बाबुराम भट्टराई भावुक बनेका थिए ।

देश ३ का मुख्यमन्त्री अनुराधा कोइरालाले आशु झार्दै डा. देवकोटाबाट अनुशासन सिक्नु पर्ने बताइन् । 

श्रद्धाञ्जलीपछि मंगलबार नै डा देवकोटाको पशुपति आर्यघाटमा दाहसंस्कार गरिने भएको छ । देवकोटाको अन्तिम संस्कार विद्युतीय मेसिनबाट गरिने पारिवारिक स्रोतले जानकारी दिएको छ । उनको काजक्रिया ७ दिनमै सक्ने पनि परिवारले जनाएको छ ।