स्वास्थ्यमा सुधार भएपछि दशौँ दिनमा घर फर्किए सत्यमोहन जोशी

स्वास्थ्यमा पूर्ण सुधार भएपछि दिउँसो घर पठाइएको अस्पतालका निर्देशक सुरज बज्राचार्यले जानकारी दिए। उनले भने, 'शताब्दी पुरुष सत्यमोहन जोशीको छातिमा समस्या देखिएपछि हामीले अस्पतालमा भर्ना गरेका थियौँ। उहाँमा कोरोना सङक्रमणको पनि परीक्षण भयो। सङ्क्रमण देखिएन। रक्तचाप नियन्त्रणमा आएको छ। क्षयरोगको परीक्षण गर्दा रिपोर्ट नेगेटिभ आएको छ।'

नेपाल समय | शुक्रबार, असार ४, २०७८

नेपाल समय

शुक्रबार, असार ४, २०७८

स्वास्थ्यमा सुधार भएपछि दशौँ दिनमा घर फर्किए सत्यमोहन जोशी

काठमाडौं- वाङ्मय शताब्दी पुरुष सत्यमोहन जोशी दशौँ दिनमा अस्पतालबाट घर फर्किएका छन्। श्वासप्रश्वास, छाति, मुटुको चालमा समस्या तथा रक्तचापमा समेत कमी देखिएपछि ग्वार्काेस्थित किस्ट शिक्षण अस्पतालमा भर्ना गरिएको थियो। जेठ २६ गते भर्ना गरिएका उनी शुक्रबार घर फर्किएका हुन्।

लामो उमेरका कारण निमोनियाले असर नगरोस् भनेर ९ दिन अस्पतालमा राखेर उपचार गरिएको निर्देशक बज्राचार्यको भनाइ छ। एक हप्तापछि फलोअपका लागि शताब्दी पुरुषलाई चिकित्सकले स्वास्थ्य जाँच ‍गर्ने उनको भनाइ छ।

अस्पतालले केही समय पहिले शताब्दी पुरुष जोशी र उनकी धर्मपत्नी राधादेवीको आजीवन निः शुल्क उपचार गर्ने प्रतिबद्धता जनाएको थियो। नेपाली भाषा, कला, संस्कृतिको संरक्षणमा विशेष योगदान दिँदै आएका जोशी गत वैशाख ३० गतदेखि १०१ वर्ष पूरा गरी १०२ वर्षमा प्रवेश गरेका छन्।

प्रकाशित: Jun 18, 2021| 14:05 शुक्रबार, असार ४, २०७८