नेकपाको पहिलो बैठकमै झट्का, शेरचन अनुपस्थित, बोहराको बहिष्कार

काठमाडौं- सत्तारुढ नेपाल कम्युनिस्ट पार्टी (नेकपा) स्थायी समितिको पहिलो बैठकमै तनाव भएको छ। पार्टीको विधान, नियमावली र मर्यादाक्रमलाई लिएर विवाद उत्पन्न भएको हो। 

उक्त पार्टीको स्थायी समिति बैठक शनिबार साँझ प्रधानमन्त्री निवास बालुवाटारमा बसेको थियो । ३ जेठमा तत्कालीन एमाले र माओवादी केन्द्रबीच एकीकरण भएपछिको पहिलो स्थायी समिति बैठक हो त्यो । 

नियमावली र विधान निर्वाचन आयोगमा बुझाइए पनि त्यसमा रहेका धेरै कुरामा स्थायी समिति सदस्यहरूले आपत्ति जनाउँदै आएका छन् । विधान र नियमावली पारित गर्ने शनिबारको बैठकको एजेन्डा थियो । 

तर, स्थायी समिति सदस्यहरूले आपत्ति जनाएपछि सुझावसहित सचिवालयमा छलफल गर्ने तय भएको छ । छलफलबाट आउने निष्कर्ष १५ दिनपछि स्थायी समितिबाट पारित गराउने निर्णय भएको छ । 

पार्टी एकीकरणमा बाधा नहोस् भनेर त्यतिबेला आफूहरूले आपत्ति नजनाएको असन्तुष्ट स्थायी समिति सदस्यहरूले बैठकमा बताएका थिए । तर, छलफल र सल्लाह नै नगरी बनाएको विधान र नियमावली मान्य नहुने उनीहरूले बताएका छन् । 

यसरी आपत्ति जनाउनेहरूमा स्थायी समिति सदस्य भीम रावल, अष्टलक्ष्मी शाक्य, जनार्दन शर्मालगायत थिए । 

बोहराको बहिष्कार,  शेरचन अनुपस्थित

स्थायी समितिमा आमन्त्रित सदस्य राखिएकामा असन्तुष्टि जनाउँदै आएका अमिक शेरचन बैठकमा सहभागी भएनन् । स्रोतका अनुसार आफूलाई आमन्त्रित सदस्यमा राखेर अपमान गरिएको बताउँदै सहभागी नभएका हुन् । 

तत्कालीन एमालेको अनुशासन आयोगका अध्यक्षका रूपमा बोहराले दुई कार्यकाल बिताएका थिए । आमन्त्रित सदस्यको बिल्ला नहटाइएसम्म सहभागी नहुने उनले जानकारी गराएर उनी बालुवाटारबाट बाहिरिन खोजेका थिए । तर, अध्यक्षहरू केपी ओली र पुष्पकमल दाहाल प्रचण्डले छलफल गर्ने आश्वासन दिएपछि उनी बसेका थिए ।