संसद भवन जहाँ पंखासमेत चल्दैनन्

धनगढी- असारको महिना, प्रचण्ड गर्मी, भवनको ढोकाभित्र छिर्नेबित्तिकै सबैका आँखा सिलिङतिर जान्छ । हलको सिलिङमा रहेका तीन वटाबाहेक अरू पंखा चल्दैनन् । 

हलभित्र छिर्ने सबैका आँखा तिनै नचल्ने पंखातिर पुग्छन् । अनि, अनुहारबाट बग्ने पसिना पुछ्दै प्रदेश-७ संसदको कारवाहीतिर ध्यान दौडाउँछन् । 

जिल्ला समन्वय समितिको हललाई प्रदेशसभाको बैठकस्थल बनाइएको छ । गत शुक्रबार प्रदेशको आगामी आर्थिक वर्षको बजेट सार्वजनिक गरिँदै थियो । १५ मध्ये १२ वटा पंखा बन्द थिए । 

हलमा प्रवेश गर्नासाथ सांसदहरू पंखाका स्विच अन गर्ने प्रयास गरिरहेका थिए । तर, कुनै पंखा घुमेनन् । सत्तापक्षका सांसद बस्नेतिरका दुई र मर्यादापालक उभिनेतिरको एउटा मात्र पंखा घुमिरहेका थिए । सांसद, विशिष्ट व्यक्ति, पत्रकार र दर्शक सबैको शरीर असिनपसिन देखिन्थ्यो ।

'आज मात्र पंखा नचलेको होइन, सधैं यस्तै हो,' कांग्रेस संसदीय दलका नेता रणबहादुर रावलले भने, 'कति पटक संसदमै कुरा उठाइयो, कति पटक भेटेरै भनियो । तर, पंखा चल्नुको साटो बन्द हुने क्रम बढ्दो छ ।' वातानुकुलित बनाइनुपर्ने हलमा पंखासमेत नचल्दा सांसदको बसाइ सकसपूर्ण रहेको उनले बताए । 

प्रदेशका आर्थिक मामिला मन्त्रीले संसदमा बजेट प्रस्तुत गरिरहँदा गर्मीले असिनपसिन भएका सांसदहरू हातमा रहेको कार्यसूचीले आफूलाई हम्किरहेका थिए । त्यो पनि मर्यादापालकले रोके । 

पहाडी जिल्लाबाट आएका सांसदहरूलाई गर्मीले बढी समस्या भएको बझाङकी नेकपा सांसद शान्ता नेपालीले बताइन् । पटक–पटक यसबारेमा सभामुखसमक्ष कुरा राखे पनि सुधार नभएको उनले बताइन् । 

डोटीकी नेकपा सांसद अर्चना गहतराजले पनि सदनमा बस्नै गाह्रो भएको बताइन् । बजेट प्रस्तुत गर्दै गर्दा सभामुख अर्जुनबहादुर थापाको सिटनजिकको पंखा पनि चलिरहेको थिएन । टेबलको बत्तिसमेत नबल्दा इमर्जेन्सी लाइट बाल्नु परेको थियो । 

संसद सचिवालयको व्यवस्थापकीय कमजोरी बैठकस्थलमा पस्नासाथ छर्लंग हुन्छ । 

पुरानो संरचनाका विद्युत्को वाइरिङ, मिटर सबै बदल्नुपर्ने भएकाले यस्तो समस्या आइरहेको संसद सचिव बालाराम शर्माले बताए । भरपर्दो विद्युतीकरणका लागि स्थानीय कार्यालयलाई आग्रह गर्दा अटेर गरेपछि प्राधिकरणका कार्यकारी निर्देशक कुलमान घिसिङलाई नै फोन गरेर थ्री फेजको ट्रान्सफरमर जडान गरिएको उनको भनाइ छ । 

संसद् भवनका लागि १५ वटा एसी खरिद भएर आइसकेकाले केही दिनमै जडान गरिने जानकारी दिए ।

संसद बैठकमा पंखा चलाउन खोज्दै सांसदहरू । र, बसेर हातमा रहेको कार्यसूचीबाट हावा लिँदै । तस्बिर : शिवराज खत्री/नेपाल समय